Lulzim Basha përmes një statusi në Facebook, ka kujtuar fitoren e parë të Partisë Demokratike në zgjedhjet pluraliste të 22 marsit 1992. Basha shkruan se udhëtimi drejt Europës ka qenë i dhimbshëm dhe plot sakrifica, ndërsa shton se Shqipëria është sërish në udhëkryq.
“Me 22 mars 1992 shqiptarët fituan lirinë. Si sot 27 vjet më parë njerëzit u bashkuan me të vetmen dëshirë dhe ëndërr: lirinë për të ndërtuar një jetë më të mirë, lirinë për të lëvizur, lirinë për arsim, lirinë për biznes, lirinë per tu shprehur, lirinë për të zgjedhur e për tu zgjedhur. Ky udhëtim 27 vjecar drejt lirisë dhe Europës demokratike me arritjet dhe dështimet e tij, ka qenë i dhimbshëm dhe plot sakrifica. Sot Shqipëria po na thërret përsëri sepse rruga jonë drejt lirisë dhe Europës është në udhëkryq! Është në dorën tonë ta përmbyllim atë duke ndërtuar edhe në Shqipëri sistemin e vlerave të vërteta europiane!”, shkruan Lulzim Basha.
Më 22 mars 1992 u mbajtën zgjedhjet e para demokratike në Shqipëri. Në përfundim të tyre, Partia Demokratike mori një fitore plebishitare me mbi 1 milionë vota, duke siguruar 92 mandate në Kuvendin e Shqipërisë. Kryeministër u zgjodh Aleksandër Meksi, ndërsa president Sali Berisha./Opinion.al
