Udhëheqësi i Bjellorusisë, Alexander Lukashenko, ka pranuar se ai dhe Vladimir Putin janë “njerëzit më toksikë dhe më të dëmshëm në planet”. Dyshja mbajtën një samit dje mes spekulimeve të mediave ndërkombëtare se lideri i Kremlinit do të detyrojë Lukashenkon t’i bashkohet luftës së tij në Ukrainë. Deri më tani, Lukashenko i ka rezistuar të qenit pjesë e luftës.
“E dini, ne të dy jemi agresorë. Njerëzit më të dëmshëm dhe toksik në këtë planet. Kemi vetëm një mosmarrëveshje kush është më toksik? Vladimir Putin thotë se është ai. Unë tashmë kam filluar të mendoj se ai është me të vërtetë më i dëmshëm. Dhe nëse dikush sot mendon të na copëtojë, nuk do t’ia dalin”-tha Lukashenko.
Putini buzëqeshi teksa dukej se ishte dakord me deklaratën e Lukashenkos. Të dy liderët përdorin shërbimet e tyre sekrete për të torturuar dhe poshtëruar armiqtë politikë, sipas grupeve të të drejtave të njeriut dhe politikanëve të opozitës.
Armiqtë e tyre politikë janë kryesisht të burgosur ose janë detyruar të mërgojnë.
Putin u takua me Lukashenkon gjatë një vizite të rrallë në Bjellorusi, duke nxitur frikën në Kiev se ai synon të bëjë presion ndaj ish-aleatit të tij sovjetik për t’u bashkuar me një ofensivë të re tokësore që do të hapte një front të ri luftes kundër Ukrainës.
