Forcimi i lekut, sipas Guvernatorit Gent Sejko, ka bërë që Shqipëria të ketë një nga nivelet më të ulëta të inflacionit dhe rritjen më të madhe ekonomike në rajon. Ndalur të luhatjet në kursin e këmbimit, ai ka renditur disa arsye.
“Këshilli gjykon se forcimi i kursit të këmbimit i ka mundësuar ekonomisë shqiptare që të ketë një nga nivelet më të ulët të inflacionit, të normave interesit dhe kostot e financimit si dhe një nga nivelet më të larta të rritjes ekonomike në rajon, por mbetemi të vëmendshëm ndaj shpejtësisë së forcimit dhe luhatjes së kursit gjatë muajve të fundit. Remitancat, turizmi, investimet e huaja, pra këto tregojnë se kemi një forcim të kusit të këmbimit”, përfundoi kreu i Bankës së Shqipërisë.
Deri më tani, kjo luhatje, sipas Sejkos, nuk ka pasur dëmtim në tregun valutor apo stabilitetit ekonomik. Në rast se kjo do të ndodhë, Sejko tha se Banka e Shqipërisë do të ndërhyjë.
“Nëse zgjerohen mund të dëmtojë tregun valutor dhe objektivin tonë të stabilitetit të çmimeve dhe financiare, nëse do konstatojmë do ndërhyjmë në tregun e brendshëm valutor në përmbushje të mandatit të saj valutor”, tha Sejko.
Dy ditët e fundit, euro është rritur lehtë, e cila po këmbehet mesatarisht për 101.95 lekë. Sipas kursit të publikuar nga Banka e Shqipërisë, monedha europiane po shitet për 102.48 lekë, ndërsa po blihet për 101.40 lekë. Bashkë me euron janë forcuar lehtë edhe dollari me paundin.
