Presidenti Vladimir Putin paralajmëroi liderët e biznesit të Rusisë se ai priste “kufizime” në aspektin ekonomik, por tha se Rusia kishte marrë “masat e nevojshme”. Për sulmin në Ukrainë, në deklaratën e transmetuar të enjten në televizionin shtetëror, Putin tha:
“Ajo që doja të them së pari – gjëja më e rëndësishme, është se ajo që po ndodh ishte një masë e nevojshme. Ata nuk na lanë asnjë shans për të vepruar ndryshe. Ata krijuan rreziqe të tilla në sferën e sigurisë sa ishte e pamundur të reagonim në një mënyrë tjetër. Të gjitha përpjekjet tona dolën në zero. Ata krijuan rreziqe të tilla sa është e vështirë të kuptosh se si mund të kishte vazhduar të ekzistonte vendi ynë.”
Udhëheqësit amerikanë dhe perëndimorë janë zotuar për sanksione të ashpra, me ministrin e Jashtëm ukrainas Dmytro Kuleba që i kërkon Perëndimit të largojë Rusinë nga sistemi i pagesave ndërkombëtare SWIFT.
Putin vuri në dukje se Rusia mbeti pjesë e sistemit ekonomik global, por paralajmëroi për “kufizime” të mëtejshme dhe bëri thirrje që biznesi të punojë “në solidaritet” me qeverinë.
“Më duket se partnerët tanë duhet ta kuptojnë këtë dhe të mos i vendosin vetes detyrën që të na largojnë nga ky sistem,” tha Putin. “Për arsye politike, këto kufizime do të ndodhin.”
Presidenti i SHBA Joe Biden do të shpallë sanksione të mëtejshme ndaj Rusisë në të ardhmen./Opinion.al
