Situata në Lindjen e Mesme ka qenë objekt i bisedimit telefonik mes presidentit të sapozgjedhur amerikan, Donald Trump dhe kryeministrit izraelit, Benjamin Netanyahu.
Sipas mediave, kryeministri izraelit dhe Trump kanë biseduar në telefon mëngjesin e sotëm (16 Dhjetor) dhe kanë diskutuar progresin në bisedimet për një marrëveshje për lirimin e të burgosurve të mbajtur në Rripin e Gazës dhe zhvillimet në Siri.
Presidenti i zgjedhur amerikan thuhet se ka deklaruar dëshirën e tij për një armëpushim dhe një marrëveshje për lirimin e pengjeve përpara se të marrë detyrën më 20 Janar, duke thënë se do të ketë “ferr për të paguar” nëse ata nuk kthehen në Izrael.
Biseda ka pasur në qendër Gazën dhe Sirinë gjithashtu, pasi edhe atje situata mbetet e paqëndrueshme pas arratisjes së Bashar al Assad dhe marrjes së vendit nga rebelët e Hay’at Tahrir al-Sham (HTS).
Në krahun tjetër. ii dërguari special i OKB-së për Sirinë, Geir Pedersen, mbërriti sot në Damask ku u takua me kreun e grupit islamik Hayat Tahrir al-Sham (HTS), Al-Jolani, kreu i koalicionit që përmbysi pushtetin e Bashar al-Asad.
Kështu është bërë e ditur përmes një komunikate për media nga grupi.
Abu Mohammad al-Jolani, i cili tani shkon me emrin e tij të vërtetë, Ahmad al-Chareh, dhe Pedersen diskutuan “ndryshimet në skenën politike, të cilat kërkojnë rishikim” të Rezolutës 2254 të Këshillit të Sigurimit të OKB-së, sipas deklaratës së publikuar në Telegram.
Rezoluta e miratuar në vitin 2015 përcakton një udhërrëfyes për një zgjidhje politike në Siri.
