Kryeministri i Izraelit, Benjamin Netanyahu nuk po bën mjaftueshëm për të arritur një marrëveshje me Hamasin. Kështu është shprehur për mediat, Presidenti i SHBA-së, Joe Biden. I pyetur nëse ai po planifikonte të paraqiste një marrëveshje përfundimtare për pengjet për të dyja palët këtë javë, Biden tha se “jemi shumë afër kësaj”. “Shpresa buron nga përjetësia”, shtoi ai kur u pyet nëse një marrëveshje do të ishte e suksesshme.
Vdekjet e fundit të pengjeve shkaktuan më shumë kritika ndaj strategjisë së armëpushimit të administratës Biden në Gaza në mes të fushatës presidenciale të SHBA-së dhe rritën presionin ndaj Netanyahut nga izraelitët për të sjellë pengjet e mbetura në shtëpi. I pyetur nëse mendonte se Netanyahu po bënte mjaftueshëm për të siguruar një marrëveshje pengjesh, Biden tha “Jo”.
Kritikat e reja të Biden ndaj Netanyahut vijnë pasi ai dhe zëvendëspresidentja Kamala Harris, përballen me thirrje të shtuara për veprime vendimtare për t’i dhënë fund luftës gati 11-mujore në Gaza. Konflikti ka mbjellë përçarje midis demokratëve, me shumë progresistë që i bëjnë presion Bidenit që të kufizojë ose të paktën të vendosë kushte për furnizimet me armë të SHBA-së për Izraelin, aleatin kryesor të Uashingtonit në Lindjen e Mesme.
Ndërkohë raportohet se forcat izraelite vranë të paktën 48 palestinezë në 24 orët e fundit në të gjithë Rripin e Gazës ndërsa luftonin kundër militantëve të udhëhequr nga Hamasi, thanë zyrtarët palestinezë. Shtatë palestinezë u vranë në dy sulme ajrore izraelite në qytetin e Gazës, thanë zyrtarët palestinezë, ndërsa dy sulme ajrore vranë gjashtë të tjerë në Bureij dhe Nuseirat, dy nga tetë kampet historike të refugjatëve të Rripit të Gazës.
Sakaq, dhjetëra mijëra persona pushtuan rrugët në mbarë Izraelin. Me flakadanë në duar dhe thirrje kundër Netanyahut, kërkuan që kryeministri të bëjë ç’është e mundur për të sjellë të dashurit e tyre në shtëpi. Ministri i jashtëm, Israel Katz, thekson se Izraeli do të reagojë me fuqi të plotë në hakmarrje kundër Hamasit. Por grupimi palestinez pretendon se shteti hebre është përgjegjës për vdekjen e pengjeve dhe refuzon të firmosë marrëveshjen e armëpushimit.
