Pesë ditë pas sulmit të Hamasit në territorin jugor të Izraelit, kreu i forcave të armatosura, Herji Halevi, pranoi se ushtria e vendit kishte dështuar në ndalimin e infiltrimit të Hamasit.
Në deklaratën e tij të parë publike që nga fillimi i luftës, Halevi deklaroi se “IDF-forcat e armatosura izraelite janë përgjegjëse për sigurinë e vendit dhe qytetarëve të tij, dhe të shtunën në mëngjes në zonën përreth Rripit të Gazës, ata nuk e bënë punën siç duhet. Ne do të mësojmë, do të hetojmë, por tani është koha e luftës”, u shpreh ai.
Siç raportohet nga Times of Israel , ai tha se Izraeli do të bëjë gjithçka që mundet për të liruar pengjet e mbajtura nga Hamasi dhe grupet e tjera.
“Ne po vrasim shumë terroristë, shumë komandantë, po shkatërrojmë infrastrukturën terroriste që mbështeti këtë krim të tmerrshëm, brutal”, theksoi ai.
Rreth 200 izraelitë dhe shtetas të huaj po mbahen rob nga Hamasi në Rripin e Gazës. Halevi tha gjithashtu se:
“Sulmi i terroristëve të Hamasit ndaj fëmijëve tanë, grave dhe njerëzve tanë, është kafshërore dhe çnjerëzore. IDF po lufton terroristët e pamëshirshëm që kryen akte dhune të paimagjinueshme”.
Ai i përshkroi njerëzit e Hamasit që kryen këtë sulm si “njerëz të vdekur”.
Sa i përket sulmit dhe mënyrës sesi Hamasi e kreu atë, Halevi tha se do të vijë koha për të hetuar se si arriti ta kryente sulmin./Opinion.al
