Një “luftë” ka nisur së fundmi mes të rinjve të koalicionit PS-LSI, që akuzojnë njëri tjetrin për mashtrime, vjedhje, servilizma, teksa fyejnë, sulmojnë apo ironizojnë me vargje ironike njëri tjetrin.
Të paktën kështu duket së jashtmi, si një “luftë” që tregon se si krisjet mes të “mëdhenjve” të partive LSI e Ps, kanë arritur te më të vegjëlit, rinia e “FRESSH” dhe “LRI”, krisje që erdhën nga qëndrimet e kundërta të Ramës dhe Metës për reformën në drejtësi.
Por a është realisht kështu? Është transmetuar realisht një konflikt (me porosi apo në mënyrë të natyrshme qoftë)?
Apo janë vetë këta të rinj që dalin vullnetarë për tu hedhur në sulm, me qëllimin e vetëm për t’i rënë në sy krerëve të partive?
Për ta kuptuar këtë, mjafton t’i rikthehesh deklaratave të tyre.
Në këto deklarata ka një gjë të përbashkët, qoftë te ato LRI-së, qoftë te ato të PS-së: Prirja për të qënë mbështetja e liderëve të partisë, për të dhënë përshtypjen se rinia, pjesa më energjike e shoqërisë dhe partisë është me ta, çfarë do lloj vendimi politik, kokëkrisur apo jo, të marrin liderët, rinia është me ta.
“Ilir Meta na ke gati, me ty, jemi te gjithe Mujo Ulqinaku” -shkruante Dejana Kallogjeroviç e LSI.
Eljo Hyska i FRESSH, i thurrte dje vargje thumbuese “armiqve” të LRI-së, pa asnjë argument, vetëm ironi.
A ka në këto deklarata ndonjë argument logjik për konflikt idesh, bindjesh, parimesh, qoftë edhe arsyetim qëndrimesh? Jo, as mbështetja që i japin kryetarëve nuk është e mbështetur në argument.
A di ndonjë nga këta të rinj të na tregojë arsyen, pse e “do” kaq shumë kryetarin e vet?
Pa shkuar më tej, te format banale të thurrjes së këngëve ndaj liderit, siç na dëgjuan veshët dje.
Replikat sipërfaqësore mes këtyre të rinjve, që në thelb nuk kanë asnjë kauzë të vërtetë, asnjë arsye të qënësishme për kacafytjet e tyre publike, të çon te e vetmja logjikë:
Servilizëm për t’i rënë në sy liderit.
Bën sens tani që jemi vetëm një vit larg zgjedhjeve elektorale. Me gjasë, këta të rinj, që marrin përsipër të bëhen gardianë publikë të kryetarëve, i gjejmë në listat e kandidatëve për deputetë.
Opinion.al
