Në Konventën e LSI ku votohet për strukturat drejtuese, Luan Rama ka shpjeguar atë që ka dashur thotë kryetari i tij, Ilir Meta se koalicioni PS-LSI ka potenciale të pashfrytëzuara. Në një intervistë për TCH, Rama tha se “LSI është me këmbë në tokë dhe kritikoi Kryeministrin i cili flet me arrogancë dhe me gjuhën e 1 milionë shuplakave.
Në fjalën e tij kryetari Ilir Meta përmendi se ka potenciale të pashfrytëzuara në koalicionin qeverisës. Si përkthehet kjo deklaratë e tij, një “mea kulpa” për gjërat që nuk janë bërë dhe një mundësi për t’i zgjidhur ato në një koalicion të ardhshëm zgjedhor?
Luan Rama: Mendoj se ajo që tha z. Meta është e qartë, e drejtpërdrejtë dhe vjen prej bindjes dhe pretendimit tonë se ekzistojnë potenciale, mundësi dhe energji që duhet të sinkronizohen më mirë tek prioritetet qeverisëse, si tek reformat thelbësore, ose shkurt tek produkti që shkon tek qytetari.
E vlerësoj të drejtë qëndrimin e tij se ka potenciale të pashfrytëzuara, të cilat duhet të jenë objekt i një diskutimi të përbashkët. Në fund të mandatit të parë qeverisës duhet bërë një bilanc, që nuk është rozë dhe një analizë realiste në funksion të asaj çfarë duhet përmirësuar është shenjë serioziteti e koalicionit dhe shenjë respekti ndaj besimit qytetar. Nuk duhet të flasim me gjuhën e 1 milion shuplakave, siç dëgjon retorikën euforike të qeverisë. Ne duhet të dëgjojmë qytetarin dhe të fokusohemi tek shërbimi. LSI duhet të ketë një rol frenues të kësaj arrogance të pushtetit dhe të fokusohet tek shërbimi.
Në fjalën tuaj ju përmendët se ka një dallim thelbësor mes jush dhe partnerit në koalicion, se ju nuk largoheni nga rrënjët. Çfarë do të thotë kjo?
Luan Rama: Unë e thash dhe në fjalën time dhe i qëndroj idesë se e majta moderne e progresiste shqiptare duhet jo vetëm të respektojë traditën dhe vlerat fondamentale të saj, por duhet të ruhet prej snobimit për të luftuar politikisht me slogane apo qëndrime të djathta. Për këtë arsye thash se, ndryshe nga aleatët në qeverisje ne qëndrojmë fort tek rrënjët, tek vlerat si solidariteti e humanizmi, pasi është misioni ynë historik të qëndrojmë në anën e qytetarëve dhe duhet ta ridimensionojmë rolin dhe opozicionin tonë në qeveri për ruajtjen e këtyre vlerave dhe për të mos lejuar eksperimente që ndikojnë në një masë të gjerë te publiku. I qëndroj bindjes se sistemi ynë i taksimit, për shembull, penalizon njësoj si punën edhe pronën.
