Pas reagimit të Departamentit të Shtetit të SHBA lidhur me deklaratat e Presidentit Meta, nënkryetari i Lëvizjes Socilaliste për Integrim, Luan Rama ka thënë se është plotësisht dakord qëndrimin e tyre.
Në një status në Facebook, ai ka shkruar se është “plotësisht dakord” me DASH duke ju referuar deklaratës së tyre se “respektimi i ligjit është mbi të gjitha”.
“Plotësisht dakord me Departamentin Amerikan të Shtetit! Asnjë dilemë, asnjë mëdyshje. Plotësisht dakord me Departamentin Amerikan të Shtetit: “respektimi i ligjit është mbi të gjitha”. Shqipëria nuk ka rrugë tjetër përveç zbatimit të Kushtetutës dhe përshpejtimit të ritmit të reformave të integrimit europian, në partneritet të plotë dhe strategjik me SHBA. Larg duart e politikës nga reforma në drejtësi, larg duart nga Gjykata Kushtetuese!” shkruan Luan Rama.
Më herët, zëdhënësi i DASH i tha Zërit të Amerikës se “është në dijeni” të komenteve të Presidentit Ilir Meta ndaj ambasadës së Shteteve të Bashkuara dhe diplomatëve amerikanë dhe se “është duke e vëzhguar situatën”. Ai shtoi se “respektimi i ligjit është mbi të gjitha” dhe se “qëndrimi i Shteteve të Bashkuara nuk ka ndryshuar” lidhur me çuarjen përpara të reformave.
Presidenti Meta ka njoftuar ndërkohë një konferencë për mediat në orën 18:30 në të cilën do të komentojë edhe mbi deklaratën e DASH. /Opinion.al
