N/kryetari i LSI, Luan Rama nga selia e kësaj partie ju drejtua Edi Ramës me fjalët se bashkëqeverisja nuk ka qenë në bazë tepsie apo timoni por në bazë parimore. Sot, kur Edi Rama sulmon punonjësit e emëruar nga LSI si të korruptuar dhe kërkon të qeverisë vetëm në 4 vitet e ardshme, LSI i kërkon ballafaqim me Kryeministrin dhe e akuzon për faktin se Policia e Shtetit që e ka drejtuar Rama në mënyrë ekskluzive është e lidhur me trafikun e drogës. Sipas Luan Ramës janë ngritur trarët e doganës për të kaluar droga nga Policia dhe Dogana e drejtuar nga kreu i Rilindjes.
Pjesë nga fjala e Luan Ramës
Bashkëqeverisja PS-LSI nuk ka qenë marrëveshje për tepsi as për koncesione as për kanabizimin e vendit, por ka qenë parimore për të ndërtuar Shqipërinë Europiane . Konsensus për të vënë në funksion reformat e dakordësuara dhe emërimet që janë në përgjegjësi të Kuvendit.
Ku e ka penguar LSI kryetarin e Rilindjes të përmbushë reformat? Për çfarë reformë ka krijuar kosto LSI?
Kemi qenë protagonistë të reformës në drejtësi, ne nuk e lejuam për të kapur sistemin, për të deformuar reformën.
Të thotë publikisht kryetari i Rilindjes që dërdëllit lart e poshtë ku e kemi penguar ne?
Kush janë shushunjat në administratat për të cilët flet kryetari i Rilindjes? Në cilën hipoteka ka shushunja?
Apo pjesa e drejtuar nga LSI qenka tepsi e helmuar dhe ajo e drejtuar nga PS e ëmbël?
Ashtu siç ka pasur korrupsion tek policët gri ka patur edhe tek ata blu…
Policët blu dhe drejtorët e tyre janë identifikuar si bashkëpunëtorë në kanabizimin e vendit. A mban përgjegjësi kryetari i Rilindjes për këtë sepse në Ministrinë e Brendshme s’ka pasur asnjë përfaqësues të LSI-së.
Apo aty është ishulli i parajsës? Po në Tatime e Dogana a ka shushunja? Sepse doganierët kanë manipuluar skanerat për të kaluar tonelat me drogë . Na thoni e kujt është përgjegjësia?
Ndaj lëri tentativat për të mashtruar e manipuluar opinionin publik. Në krye të sistemit të korruptuar ke qenë ti, kryetari i Rilindjes. Kjo është e vërteta lakuriq. Hajde ulemi ballë për ballë shqiptarë sepse ne nuk u ikim përgjegjësive.
/Opinion.al
