LSI sulmon PS e PD-në. E quan marrëveshje të errësirës, paktin PS-PD dhe thotë se kjo marrëveshje në vend të standardit të zgjedhjeve ka hallin të hakmerret ndaj saj
Përmes një deklarate për median, nënkryetarja Kejdi Mehmetaj thotë se LSI ka bërë kallëzim për ndjekje penale për ministrat Milva Ekonomi, Gazmend Bardhi, Xhulieta Kërtusha dhe zv/ kryeministren Ledina Mandija në cilësinë e kryetares së task forcës së ngritur nga qeveria, që në shkelje flagrante të ligjit, në mënyrë arbitrare dhe në mungesë të plotë të transparencës, kanë nisur një fushatë hakmarrjeje dhe shantazhi ndaj punonjësve të niveleve të ndryshme në administratën publike.
“Ne denoncojmë publikisht fushatën e hakmarrjes dhe të kërcënimit politik ndaj njerëzve të administratës publike, të cilët me 26 qershor do të kthehen të gjithë në vendet e punës, njësoi siç ndodhi me të gjithë ata që Lulzim Basha i largoi padrejtësisht nga puna para zgjedhjeve të vitit 2013 dhe që pas fitores së LSI-së u rikthyen të gjithë në vendet e punës”, tha Mehmetaj.
Ky reagim i LSI-së vjen pasi ditën e djeshme u shkarkua nga detyra drejtori i Postës Shqiptare Majlind Lazimi dhe drejtoresha e postës së Beratit Haris Ngjeqari, pasi sipas deklaratës së ministrisë ushtronin presion mbi punonjësit që të bënin fushatë për LSI-në. Gjithashtu sot u shkarkua drejtoresha e qendrës shëndetësore të Pukës, Sajmira Laçi dhe kryeregjistruesi i pasurive në Shkodër, Edmond Ndou.
