Deputetja e LSI, Monika Kryemadhi që është zgjedhur në zonën e Lezhës ka sulmuar pikërisht nga ky qytet ministren e Arsimit, Lindita Nikolla që është deputete dhe koordinatore e PS në Lezhë.
Kritikat ndaj Nikollës nga LSI-ja vijnë një ditë pas atyre ndaj Ministrisë së Brendshme.
Gjatë një takimi me të rinj, Monika Kryemadhi është shprehur se janë bërë gabime me Maturën Shtetërore dhe ato nuk duhet të përsëriten më.
Duket se LSI tashmë po përpiqet të evidentojë çështjet më të ndjeshme për qytetarët shqiptarë duke i konsideruar si probleme të qeverisjes.
“Unë uroj që Matura Shtetërore e këtij viti të jetë ajo ç’ka ne presim sepse po cenove ëndrrat edhe shpresat e një maturanti për të ardhmen, ke cenuar shpresat dhe të ardhmet e një vendi. Ju asnjëherë nuk duhet të bëni kompromis përsa i përket dijeve tuaja. Besoj tek forca, te besimi dhe dëshira juaj për ta ndryshuar këtë gjë”,-u shpreh Kryemadhi përpara gjimnazistëve të Lezhës.
Aty ishte e pranishme edhe zv.ministrja e Arsimit, Nora Malaj që aderon në LSI. Malaj tha se po bëhen përmirësime për shkak të problematikave që lindën një vit për parë. Ajo pranoi se nuk kishte transparencë për maturantët një vit më parë.
Kritikat e Kryemadhit ndaj Nikolles vijnë një ditë pas atyre të Luan Ramës ndaj Saimir Tahirit. “Policia nuk duhet të bëjë spektaktakle por duhet të luftojë drogën”, tha Luan Rama. Nga ana tjetër u përgjigj ashpër Tahiri, duke i quajtur hiena ata që kanë dalë nga oborri i PS dhe duke akuzuar se gjithë lufta behet për vota.
/Opinion.al
