Sekretari i përgjithshëm i LSI, Endrit Braimllari, ka folur në lidhje me pjesëmarrjen e kësaj partie në zgjedhjet e 13 tetorit, datë kjo e dekretuar nga presidenti, Ilir Meta.
Gjatë një interviste televizive, Braimllari është pyetur nëse LSI është e gatshme të shkojë në zgjedhjet e 13 tetorit me Edi Ramën kryeministër. Në lidhje me këtë pyetje ai është përgjigjur duke thënë se për LSI mjafton që zgjedhjet të jenë të lira, të ndershme dhe brenda standardeve të parashikuara.
Pyetje: Është e gatshme LSI të shkojë në zgjedhje qoftë edhe me Ramën, mjafton të jetë një proces i parakohshëm?
Braimllari: Për ne mjafton që të kemi zgjedhje të lira dhe të ndershme dhe me standarde, e para. E dyta, sigurisht që LSI dallon nga forcat e tjera politike, ashtu sikundër edhe forcat e tjera dallojnë nga LSI-ja. LSI ka luajtur rol të rëndësishëm në zgjidhjen e krizave më të mëdha që ka marrë vendi. Ka qenë faktor stabiliteti për zhvillimet qoftë ekonomike, qoftë progresiste të vendit në raport me BE. Sigurisht që bëhen dallime, por ne jemi të bashkuar se bashkon kjo qeverisje dhe Edi Rama. Nuk ka ndonjë merak të madh ku dallon PD nga LSI. Meraku më i madh është largimi i këtij sistemi korruptiv dhe kriminal.
Pyetje: Meraku është 13 tetori se po të shkoni vetëm ju në zgjedhje…
Braimllari: 13 tetori është datë zgjedhjesh të pushtetit vendor e shprehur me dekret të Presidentit të Republikës. Është e ligjshme dhe e pranuar nga të gjitha forcat e opozitës. Nuk ka ndonjë parti të opozitës që del kundër 13 tetorit./ Opinion.al E.Xh.
