Joachim Low është i bindur se kush do të fitojë çerekfinalen mes Gjermanisë dhe Italisë, do të kthehet në favorit për ta fituar Euro 2016
Katër vjet janë një kohë relativisht e gjatë, por jo e mjaftueshme për të harruar zhgënjimin. Përpara duelit me Italinë, pasi ka kujtuar dhe rikujtuar disfatën në Euro 2012, Joachim Low i ka studiuar “Azzurrët” me detaje, për të evituar një tjetër humbje dhe është i vetëdijshëm për forcën e kundërshtarëve.
“Italia di të mbrohet, i kemi analizuar me detaje dhe dimë si të përballemi me ata. Nuk ka rëndësi nëse luajmë me tre apo katër mbrojtës, thelbësor është ekuilibri në skuadër.
Duhet të jemi cinikë dhe të mos gabojmë. Kemi përballë artistë të mbrojtjes dhe ndaj Italisë nuk do të kemi shumë raste për shënim. Jemi të vetëdijshëm për potencialin tonë, kemi shumë kualitet dhe talent. Të gjithë duam të shpallemi kampionë Europe.”, ka deklaruar ai.
Ai është i bindur se kush do të fitojë çerekfinalen mes Gjermanisë dhe Italisë, do të kthehet në favorite
“Padyshim që fituesi mund të arrijë të bëjë të vetin trofeun. Skuadrat që janë ende në garë si Gjermania, Franca, Italia… objektivi kryesor i tyre është të fitojnë trofeun. Të gjitha kanë cilësi”, ka theksuar ai
Pasi e cilësoi Italinë pengesën më të madhe për t’u kaluar në Euro 2016, trajneri kampion i botës nuk i beson suksesit 4-1 të Gjermanisë në miqësoren e muajit mars, por është i kujdesshëm përballë surprizave të mundshme.
“Miqësorja e luajtur në Mars nuk më entuziazmon. Italia është ai lloj skuadre që di si të reagojë edhe pas një humbje si ajo me shifrat 4-1 ndaj nesh. Janë një skuadër e fort, por ne dimë si ti përballojmë. Nuk e di nëse De Rossi do të luajë, por Italia është një skuadër fleksible, që gjithmonë gjen zgjidhje. Kundër tyre pres gjithmonë surpriza.”
