Kapiteni i Kombëtares kuqezi dhe klubit të Atalantës, Berat Gjimshiti u zgjodh lojtari shqiptar më i mirë i vitit 2024. Një çmim i akorduar nga Federata Shqiptare e Futbollit në ceremoninë e magjishme të “Topi i Artë 2024”.
Trofe tepër i merituar për qendërmbrojtësin, i cili për shkak të angazhimit me Atalantën e kishte të pamundur për t’u ngjitur në skenë, çmim i tërhequr nga nëna e tij dhe i dorëzuar nga trajneri i Kombëtares shqiptare, Silvinjo. I kënaqur për këtë vlerësim u shfaq mbrojtësi.
“Jam shumë krenar, shumë i lumtur me këtë çmim. Ky vlerësim sigurisht që më jep një shtysë shtesë dhe motivim për Atalantën, por edhe për ekipin kombëtar. Falenderoj të gjithë stafin dhe lojtarët e skuadrës shqiptare. Nëna ime ishte shumë e kënaqur, por edhe pak nervoze. Nuk dinte se çfarë të thoshte, por i thashë që të qëndrojë e qetë dhe të veproj sikur po flet me mua. Asgjë të veçantë dhe ajo e bëri shumë mirë”, u shpreh Gjimshiti.
Përzgjedhja e tij si “Lojtari i Vitit i Kombëtares” u bë nga votat e lojtarëve të Kombëtares. Gjimshiti, që aktivizohet me Atalantën në Serie A dhe mban shiritin e kapitenit te Kombëtarja shqiptare, ka pasur një vit të jashtëzakonshëm.
Ai udhëhoqi Atalantën drejt triumfit historik në UEFA Europa League dhe ishte një lojtar kyç në përfaqësimin dinjitoz të Shqipërisë në Kampionatin Europian “Gjermani 2024”.
Klan News
