Luiza Gega nuk ishte në ceremoninë hapëse të Lojërave Olimpike, Paris 2024.
Ajo ka shpjeguar arsyet se pse nuk mori pjesë, teksa thotë se është e lodhshme të jetë prezente 2 javë para garës së saj.
“Ishte një vendim i imi, kam qenë dy herë në lojëra olimpike, në Rio dhe në Tokio, ku kam qenë dhe flamurmbajtëse. E pashë nga TV, është më bukur ta shohësh nga TV më besoni. Është një lodhje për mua të rrija shumë gjatë, kështu që vendosa të mos shkoj aq herët, sepse unë e kam garën në datë 4 Gusht, kështu që i binte të shkoja 2 javë para dhe do ishte e lodhshme. Të paktën nga eksperienca që kam pasur. Unë nisem me datë 29, sot kam zbritur nga Korça, ku kam qenë përreth 1 muaj duke u stërvitur. Kështu që nisem pasnesër për në Paris.”
Kampionia e Europës në garën e 3 mijë metrave me pengesa, foli edhe për pritshmëritë e saj në këtë olimpiadë.
“Nuk është të futem në zonën medalje sepse është shumë e vështirë, duke parë edhe konkurrentet që janë pjesa më të madhe sigurisht afrikane, që tashmë janë shpërndarë në shumë kontinente, Kazakistan, Bahren, Rumani etj., e bën akoma më të vështirë sepse besoj që gjysma e finalistëve që do të përballemi do të jenë afrikane. Pres që të kem atë renditjen time më të mirë, që kam pasur ndonjëherë në lojëra Olimpike. Në Tokio arrita të futem në finale. Këtu objektivi im është të futem top 10-n, ose edhe më mirë. Duhet pastaj të shikoj si do të shkojë gara. Këto janë objektivat e mia, nuk është se kam shprehur kurrë medalje sepse është shumë e vështirë. Nëse aty janë 10500 sportistë në të gjithë llojet e sporteve, 2 mijë janë vetëm atletë”./tvklan
