Borxhi i krijuar në total në Tatime dhe Dogana llogaritet 1.2 miliardë dollarë apo 69 për qind e tij. Sipas relacionit të amnistisë, ligji fal pa kushte 400 milionë dollarë detyrime, kurse te falja me kushte Financat llogarisin 820 milionë dollarë borxhe.
Sipas ligjit të amnistisë, përfitojnë për detyrimet tatimore nga falja pa kusht 37.53 miliardë lekë, nga të cilat 16.59 miliardë principal, 12.1 miliardë gjoba dhe 8.84 miliardë kamatëvonesa.
Nga falja me kusht në Tatime llogariten 68.6 miliardë lekë, nga të cilat 19.4 miliardë lekë principal, 46.98 miliardë lekë gjoba dhe 2.1 miliardë kamatëvonesa me kusht që të paguhet 70% e principalit dhe kamatëvonesave.
Për detyrimet doganore nga falja pa kusht përfitojnë 2.63 miliardë lekë, nga të cilat 0.83 miliard detyrime, 0.96 miliard gjoba dhe 0.83 miliard kamatëvonesa. Nga falja me kusht sipas relacionit, përfitohen 13.9 miliardë lekë, nga të cilat 1.74 miliardë principal, 11.7 miliardë gjoba dhe 0.4 miliard lekë kamatëvonesa, me kusht që të paguajnë 70% të detyrimeve dhe kamatëvonesave. Në relacion shpjegohet se situata me borxhin tatimor dhe doganor, por sidomos atë tatimor, ka ardhur në rritje nga viti në vit. Në Tatime nga viti 2011 e në vijim është akumuluar 86% e totalit të borxhit. 33% e totalit të borxhit është në TVSH dhe 33% në tatimet direkte mbi fitimin e biznesit të madh dhe të vogël. Në Dogana nga viti 2011 e në vijim është akumuluar 95% e totalit të borxhit. Gjobat përbëjnë 2-fishin e detyrimeve doganore. Nëse detyrimi doganor kumulativ është 6.6 miliardë lekë, penalitetet janë 12.7 miliardë lekë. Krahas kësaj, janë edhe 2.4 miliardë lekë kamatëvonesa. Ndërkohë lidhur me çregjistrimin e mjeteve të transportit rrugor dhe shuarjen e detyrimeve, në bazë të të dhënave të Drejtorisë së Përgjithshme të Shërbimit të Transportit Rrugor janë përafërsisht 100.000 mjete që nuk janë aktive, pasi nuk kanë kryer veprime për detyrimet financiare dhe kontrollin teknik për një periudhë të gjatë kohe, afërsisht rreth 10 vjet./ panorama
