Lista/ Ja 15 vendet më të rrezikshme në botë

Si çdo vit, Indeksi Global për Paqen rendit vendet bazuar në rrezikshmërinë që ato paraqesin, në mënyrë që të zbulojë se cilat shtete janë më të sigurta dhe cilat jo.

Raporti i këtij viti, i publikuar nga Instituti për Ekonominë dhe Paqen vlerëson 163 vende për sigurinë.

Ky raport u realizua duke përdorur 23 tregues individualë, që mund të grupohen në 3 kategori: niveli i sigurisë në shoqëri, në shtëpi dhe konflikti ndërkombëtar e militarizimi.

Rreziku për secilin shtet vlerësohet me 5 yje. Vendet me më pak yje janë më paqësore.

Indeksi zbuloi se këtë vit, në botë mbizotëron më pak paqe në krahasim me vitin e shkuar, ndonëse 81 vende shfaqen më paqësore në raport me një vit më parë.

Megjithatë, janë 79 vendet, ku rezulton se përgjatë këtij viti paqja është përkeqësuar me një përqindje të lartë, për shkak të kërcënimit global nga terrorizmi dhe destabiliteti politik.

Vende ku dhuna ka ardhur dukshëm në rritje janë Jemeni, Ukraina, Turqia, Libia, Bahrain, që konsiderohen si vatra konflikti.

Ndërsa vende si Panamaja, Tailanda, Sri Lanka, Afrika e Jugut dhe Mauritania janë kthyer dukshëm më paqësore, duke shfaqur përmirësim nga viti i shkuar.

Nuk përbën aspak habi që vendi më i rrezikshëm është Siria, që vlerësohet me 3.8 yje nga 5.

Shteti në Lindjen e Mesme është konsumuar nga lufta dhe terrori islamik, me afërsisht 250 mijë të vrarë gjatë luftës civile që ka përfshirë vendin prej 5 vitesh.

Sudani Jugor renditet i dyti, si vendi më i dhunshëm, pasuar nga Iraku.

Në 15 vendet më të rrezikshme bën pjesë gjithashtu Afganistani, Somalia e Jemeni, ndërsa koflikti në Europë, ka bërë qëpjesë e kësaj liste të jenë Rusia dhe Ukraina./tvklan.al