Administrata e burgut në Shënkoll të Lezhës, liroi nga qelia pa vendim gjykate një të dënuar me 20 vjet burg për akuzën e vrasjes në Kosovë.
Shuaip Zukaj, i njohur ndryshe edhe me emrin Shaban Zukaj nga Deçani i Kosovës, është liruar nga burgu i Lezhës me të mbaruar dënimin e marre në Shqipëri për akuzën e vrasjes së mbetur në tentativë. Edhe pse në kartelën e tij personale ndodhej vendimi i formës së prerë, dhënë nga Gjykata në Shqipëri, që me përfundimin e dënimit duhej të ekstradohej në Kosovë, administrata e burgut e ka lënë atë të lirë.
Prokuroria e Lezhës ka nisur menjëherë hetimet, pasi dyshon se ai është liruar jashtë çdo procedurë ligjore. E gjithë praktika e të dënuarit është në duart e prokurorëve tashmë. Ndërsa lirimi i Zukajt ka alarmuar edhe Ambasadën kosovare në Shqipëri.
Shaban Zukaj, në vitin 2000, në Shëngjin të Lezhës, ka qëlluar me armë një shtetas kosovar për hakmarrje. Fatmirësisht shtetasi nga Kosova ka shpëtuar, por Zukaj është larguar për t’iu shmangur drejtësisë, e cila e ka hetuar e gjykuar në mungesë, ku përfundimisht është dënuar me 15 vjet burg.
Gjatë kohës së arratisjes, më 1 Shtator të vitit 2011, ai ka vrarë Zyber Derishajn dhe ka plagusur Adil Thaçin.
Pas kësaj, Zukaj është larguar në drejtim të Belgjikës, ku ka ndërruar edhe identitet.
Por për llogari të dënimit në Shqipëri, Zukaj është arrestuar në vitin 2012 në Belgjikë dhe më pas është ekstraduar në Shqipëri, ku edhe ka vuajtur dënimin në burgun e Shënkollit në Lezhë.
Gjatë qëndrimit në burg, autoritetet e Kosovës kanë sjell kërkesën për ekstradimin e tij, e cila është miratuar nga Gjykatat Shqiptare. Por pavarësisht këtij vendimi, administrata e burgut e ka lënë të lirë.
Drejtori i Përgjithshëm i Burgjeve, Artur Zoto, i tha Televizionit Klan se veprimet e administratës së burgut të Shënkollit kanë në përputhje me ligjin.
Reagon Drejtoria e Përgjithshme e Burgjeve:
Me anë të një reagimi për mediat, Drejtoria e Përgjithshme e Burgjeve sqaron se: Në dosjen e të dënuarit nuk ka ekzistuar një vendim me masë sigurie për estradim në Kosovë në përfundim të dënimit të parë. Shtetasi Zukaj ishte ekstraduar nga Belgjika për llogari të drejtësisë shqiptare në vitin 2012, pasi më parë, ai ishte dënuar në mungesë në vitin 1999, për veprat 76/2 dhe 278/4 të parashikuara nga Kodi Penal. Më pas, në vitin 2014, kur ka bërë kërkesë për rivendosje në afat, ai është dënuar me 6 vjet e 8 muaj burgim, me anë të vendimit nr. 155. Shtetasi ka përfituar ulje dënimi me vendime gjykate dhe nga amnistia. Lirimi i tij është bërë me plotësim kohe, pasi nuk ka patur një masë sigurimi tjetër ndaj tij, duke vepruar kështu plotësisht në përputhje me vendimin ekzistues të gjykatës.
