Prokuroria e Durrësit ka nisur hetimin kryesisht për lirimin e Lul Berishës, ish-kreut të bandës së Durrësit. Në hetim janë gjykata dhe bashkia e Durrësit
Hetimet nisen pas angazhimit të PD-së. Sot Basha ishte personalisht në zyrën e Llallës për këtë çështje. Hetimet nga prokuroria e Durrësit kanë nisur kryesisht për akuzën “shpërdorim detyre”. Prokuroria e Durrësit ka dyshime të arsyeshme që zyrtarë të caktuar mund të kenë kryer veprime në kundërshtim me ligjin, me qëllim krijimin e kushteve për pranimin e kërkesës për lirim para kohe me kusht të të dënuarit Lulzim Berisha.
Do të hetohen praktikat gjyqësore si dhe praktikat administrative të bashkisë së Durrësit, bëri të ditur organi i akuzës.
Njoftimi i prokurorisë
“Nga verifikimet e kryera, ka rezultuar ndër të tjera se, Gjykata e Apelit Durrës, me vendimin e saj datë 05. 12. 2016, ka vendosur :“Pranimin e kërkesës së të dënuarit Luzim Berisha dhe lirimin me kusht nga vuajtja e mëtejshme e dënimit penal me burgim të dhënë me vendimin nr. 1, date 16. 01. 2012, te Gjykatës për Krime të Renda, i ndryshuar me vendimin nr. 175, datë 16. 07. 2014, të Gjykatës së Larte, për pjesën e mbetur të pavuajtur të dënimit, prej gjashte vjet e dy muaj e 22 ditë burgim. Nga të dhënat paraprake, rezulton se Lulzim Berisha ka përfituar nga një seri e gjatë vendimesh gjykate për ulje dënimi, si edhe ka përfituar nga ligji i vitit 2012 Për Amnistinë”, thuhet në njoftim.
Gjithashtu, nga informacioni i publikuar në media rezulton që në vendimin e Gjykatës së Apelit Durrës, shkruhet se “Bashkia Durrës, duke vlerësuar gjendjen e kësaj familjeje, sjelljen e tyre në komunitet, si dhe mundësinë e lirimit të të dënuarit, garanton punësimin e të dënuarit Lulzim Berisha, në pamundësi për tu punësuar në ndonjë subjekt privat.
Nën hetimin e prokurorisë janë vendimet e dhëna, në kohë të ndryshme për të dënuarin Lulzim Berisha nga gjyqtarë të Gjykatës së Durrësit, për përfitim të uljes së dënimit, përfitimit të amnistisë, si dhe ndryshimin e vendit të vuajtjes së dënimit nga burgu i sigurisë së lartë, në atë të zakonshëm.
Prokuroria e Durrësit ka dyshime të arsyeshme që zyrtarë të caktuar mund të kenë kryer veprime në kundërshtim me ligjin, me qëllim krijimin e kushteve për pranimin e kërkesës për lirim para kohe me kusht të të dënuarit Lulzim Berisha”, thuhet në njoftim.
