Gjykata e Tiranës ka lënë në burg Roland Ahmetsulajn, në kuadër të hetimeve për vrasjen e Erion Çelës në “Don Bosko” si dhe plagosjen e Blerim Çela, Edmond Crroj, Arben Dani dhe Azbi Selimaj.
Ahmetsulaj ka deklaruar në gjykatë se nuk ka lidhje me këtë krim. Por prokuroria ka mbledhur fakte dhe prova që e akuzojnë se ai është i përfshirë. Nga tabulatet telefonike, rezulton se ai ka folur disa herë para dhe pas vrasjes me Kevin Suçin, i cili akuzohet si personi që ka kryer atentatin. Por Ahmetsulaj, i cili ka në pronësi një servis makinash, thotë se ka folur me Suçin vetëm për rregullimin e mjetit të tij.
Roland Ahmetsulaj: Nuk kam lidhje me ngjarjen. Dy ditë para vrasjes kam patur bisedën me Kevin Suçin për rregullim makine. Më ka marrë për makinën nëse është rregulluar ose jo.
Avokati i Ahmetsulajt theksoi në gjykatë se bashkëpunëtorët e drejtësisë, Indrit e Gentjan Beqiraj, nuk e kanë përmendur emrin e klientit. Sipas hetimeve, shtetasi Kasandër Noga ka paguar për vrasjen e shtetasit Geron Hasanbelliu, por është ngatërruar shënjestra duke ekzekutuar gabimisht Erion Çelën e plagosur 4 të tjerë.
Noga ka pasur hasmëri që prej vitit 2000 me vëllezërit Hasanbelliu për atë që njihet “Masakra e Senatoriumit”. Ai së bashku me Julian Çelën vranë në dhomën e spitalit babain e tyre, Aqif Hasanbelliun dhe Dritan Hajdinin.
Dy vellezërit, dy vite më pas, në Belgjikë, ekzekutuan Julian Çelën dhe plagosën rëndë Kasandër Nogën. Pas dy vitesh, Noga ka qëlluar në qendër të Brukselit, Erion Hasanbelliun, i cili mbeti i plagosur rëndë. Policia belge arrestoi Nogën dhe aktualisht ai ndodhet në burg.
Klan News
