Ka përfunduar hartimi i projektligjit që parashikon ndryshime në ligjin e Sportit dhe tashmë ai është gati për konsultim publik.
Ministria e Arsimit, Sportit dhe Rinisë synon që me anë të këtij projektligji të ndryshojë pikat 5 dhe 6 të nenit 7 të ligjit nr. 79/2017, që do të sjellin përjashtimin nga detyrimet doganore dhe tatimi mbi vlerën e shtuar të ndihmave apo sponsorizimeve me materiale dhe pajisje sportive për klubet sportive, të cilat vijnë nga institucione ndërkombëtare apo çdo formë tjetër sponsorizimi, që kanë për qëllim nxitjen dhe rritjen e nivelit të sportit shqiptar në rang ndërkombëtar.
Një tjetër risi që sjell ky projektligj për organizatorët e veprimtarive sportive është se ato do të përfitojnë 100% të të ardhurave të përfituara nga e drejta e transmetimit audioviziv.
Në relacionin që shoqëron projektligjin trajtohet gjithashtu karta e tifozit, e cila është parashikuar si një marrëveshje kontraktuale midis tifozëve dhe klubeve. Në të, do të përcaktohen të drejtat dhe detyrimet e klubeve ndaj tifozëve dhe anasjelltas. Ajo do të shërbejë edhe si faktor lehtësimi për pajisjen me bileta. /Opinion.al
