Nën drejtimin e këshilltares së kryeministrit Edi Rama dhe në paqartësi e kontradikta, deputetët socialistë në Komisionin e Medias miratuan projektligjet e kundërshtuara për mediat online, duke i dhënë Këshillit të Ankesave brenda AMA-s fuqinë e gjykatës. Drafti final i publikuar nga kryeministri rëndon sërish gjobat. Emisioni Opinion ka trajtuar këtë të martë, pikërisht këtë zhvillim.
Pedagogu Mark Marku thotë se këto ndryshime sjellin vetëm censurë, pasi AMA sipas tij kthehet në një Gjykatë.
Mark Marku: Thonë që kanë bërë disa ndryshime që askush nuk i di, është pa sens edhe mënyra si tallet ai me parlamentin. Ka një konflikt me gjithë ndërkombëtarët dhe në orën 10 të natës thotë unë kam bërë disa ndryshime. Ndryshim është nëse ai heq ligjin, këtë e bën që nesër të mos ketë protestues. Thotë aty nëse portali nuk i përgjigjet, bllokohet portali. Nëse Klani ka një problem me edicionin e lajmeve, mbyllet Klani? Nëse thuhet mbyllet portali, ti për një pasaktësi mbyll një portal. Nuk mund të mbyllet media, për një gabim, gjobitet ose autori nëse ka një autorësi ose media. Në momentin kur ti normat vetërregulluese i kalon në ligj atëherë ti ke kaluar në censurë. Nuk mundet që një institucion si AMA të marrë atributin e Gjykatës, apo të gazetarëve. AMA shndërrohet në gjykatë dhe institucion censure.
Për deputetin socialist Musa Ulqini ligji do të bëjë një regjistrim të portaleve duke sjellë informacion që të dihet se kush janë pronarët, apo edhe nga vijnë paratë.
Musa Ulqini: As unë si relator, që po merrem për një jave me këtë gjë nuk kuptova asgjë. Ky ligj, nuk rregullon çështjen e medias së shkruar. Ky ligj rregullon median elektronike. Ky nuk është ligj-anti shpifje, është një ligj që rregullon një sektor të pa rregulluar. Sot në Shqipëri ka 700 portale, gjënë e parë që bën është të identifikohen. Regjistrimi tek AMA është vullnetar, por ligji e detyron që të bëjë një identifikim. Sot askush nuk di të thotë se këto portale, kë kanë pronar kush i financon, nga vijnë këto para. Ky ligj heq punën e zezë të gazetarëve, i mbron ata. Ky ligj lufton gjuhën e urrejtjes, diskriminimin./ Opinion.al
