Kreu i grupit parlamentar të PS Taulant Balla shpjegoi në një lidhje në emisionin “Opinion” nismën ligjore të Partisë Socialiste në atë që ai e quajti ligji për despiunizimin.
Balla mohoi që kjo nismë të jetë ndërmarr për të përjashtuar ish-presidentin Meta nga politika, ndërsa tha se kuvendi ka marr nga autoriteti sinjalizimin për një mospërputhje në ligjin e vitit 2015.
“Këtu bëhet fjalë për një paketë që do ta quaja paketa e despiunizimit. Sigurisht ka dhe paketa të tjera, ftoni zotin Alibeaj t’ju informojë për 3 projektligjet e tjera.
Kuvendi ka marr një sinjalizim nga autoriteti ku i kërkohet kuvendit që të rregullojë një mospërputhje të ligjit të miratuar në vitin 2015 me atë që ka dashur Kuvendi t’i japë këtij autoriteti, sepse në nenin 29 pika 4 ne i kemi ndaluar autoritetet të verifikojë personat që janë pajisyur me çertifikatë nga komisionet Mezini dhe Bezhani.
Neni 29 pika 4 , ka qenë mjaft i diskutuar mes LSI dhe PS në vitin 2015. Ka qenë një nen i diskutuar gjatë dhe në këtë këndvështrim mund t’ju them që ajo pengesë që ligji i pengon autoritetit të ri, duhet heq.
Ndryshimi është shumë i thjeshtë, në ligjin për dosjet e sigurimit të shtetit hiqet pengesa që pengon verifikimin për pajisjen me çertifikatë të personave që kanë qenë me çertifikatë nga dy komisionet e tjera.
70 ditë para zgjedhjeve të gjitha partitë politike janë të detyruara të çojnë para autoritetit kandidatët përkatës”, tha Balla.
I pyetur nëse kjo nismë ka për qëllim të largojë Ilir Metën apo Sali Berishën nga politika, Balla tha: “Është e pamundur të bësh pengesë ligjore për ata që kanë mbajtur pozicione të larta politike në atë kohë. Unë dhe ti biem dakord që Sigurimi i Shtetit ka qenë strukturë kriminale për shkak të së cilës kanë humbur jetën njerëz”.
Referuar nismës së zotit Meta për kallëzim ndaj autoritetit, Balla u shpreh se është gjithashtu në interes të tij të sqarojë pozicionin.
“Unë mendoj që është edhe vetë në interes të subjektit të sqarojë pozicionin që ka. Përpara se ta kallëzonte do të ishte mirë të bënte kërkesën dhe të vinte në dispozicion dosjen në fjalë”, u shpreh Balla./Opinion.al
