Një ditë pasi Ministri i Brendshëm lajmëroi ndryshimin e Kodin Penal për veprat penale në fushën e drogës mësohet se është parashikuar të dënohen më shumë trafikantët dhe të lehtësohen përdoruesit. Kështu në bazë të ligjit të ri nëse kapesh me një apo dy cigare hashash nuk të arreston policia por ndëshkohesh me gjobë.
Drafti i hartuar nga Ministria e Brendshme është dorëzuar në Këshillin e Ministrave dhe së shpejti pritet t’i kalojë për shqyrtim edhe Parlamentit.
Në argumentet që shoqërojnë draftin e ri shkruhet: neni aktual 283 i Kodit Penal është më problematiku në zbatimin e tij nga prokuroria dhe gjykata. Në këtë nen propozohet që konsumi dhe mbajtja për përdorim vetjak e një sasie të kufizuar lënde narkotike të konsiderohet shkelje administrative dhe jo penale, duke u bazuar edhe në praktikën e shumë vendeve europiane.
Sipas Ministrisë së Brendshme, për 70 përqind të personave konsumatorë të narkotikëve që policia kap, nuk procedohen penalisht nga prokuroria.
Po në nënin 283 sugjerohet: Mbajtja dhe shitja e lëndëve narkotike mbi sasinë e përcaktuar nga ligjvënësi dhe që gjithsesi konsiderohet e vogël, të ketë dënim më të ulët se mbajtja apo shitja në sasi të mëdha.
Ndërkohë, në nenin 284, përveç kultivimit të narkotikëve propozohet të përfshihet edhe tregtimi i farërave. Ashtu si për nenin 283, edhe këtu propozohet një përshkallëzim i dënimeve në bazë të rrezikshmërisë së veprës penale.
Sa më e madhe të jetë sasia e bimëve të kultivuara aq më i lartë do të jetë dënimi, por se cilat janë sasitë e vogla, të mëdha dhe shumë të mëdha, këto do të përcaktohen me ligj të veçantë njësoj si për lëndët narkotike në nenin 283.
