Pas rrëzimit nga gjykata Kushtetuese të një sërë masave ndëshkuese ndaj biznesit, në Kodin Penal dhe ligjin e procedurave qeveria duket se ka vendosur të tërhiqet nga represioni. Ministria e Financave ka hartuar një projektligj të ri për procedurat tatimore, i cili zbut gjobat ndaj një sërë shkeljeve fiskale. Lehtësitë nisin me shkeljet që lidhen me informalitetin e punës.
Për bizneset e mëdha, të cilat nuk deklarojnë punonjësit, drafti i ri e ul gjobën nga 500 mijë lekë që është aktualisht në 200 mijë lekë. Ndërsa për bizneset e vogla gjoba për mosdeklarimin e punonjësve ulet nga 250 mijë lekë që është në ligjin ekzistues në 50 mijë lekë.
“Kjo gjobë nuk aplikohet në rastin kur nga verifikimi dhe kontrolli në vendndodhjen e aktivitetit të personit fizik te vetëpunësuar, evidentohen persona, të cilët kategorizohen si persona të papaguar të familjes,” thuhet në draftin e ri.
Por veç zbutjes së masës së gjobës, ligji i ri heq ndjekjen penale për mosdeklarimin e punonjësve. Në ligjin aktual, në rast se mosdeklarimi i punonjësve është i përsëritur, ai konsiderohet automatikisht si evazion tatimor dhe ndaj biznesit nis ndjekja penale. Por me ligjin e ri kjo pikë do të shfuqizohet.
Krahas mosdeklarimit të punonjësve, qeveria ka vendosur të zbusë masat ndëshkuese edhe për bizneset, të cilat konstatohet se nuk kanë deklaruar pagat reale të punonjësve. Aktualisht gjoba për këtë shkelje është 500 mijë lekë. Por nga 1 korriku ajo do të jetë sa vlera e detyrimit dhe kontributit të llogaritur.
50 mijë lekë për çdo kupon
Për biznesin që nuk lëshon kupon tatimor, masa e dënimit do të jetë 50 mijë lekë për çdo konstatim dhe përveç masës së gjobës për tatimpaguesit e regjistruar për TVSH-në bëhet vlerësim tatimor për tre muajt e fundit. Në ligjin paraprak qe u miratua vitin e kaluar gjoba për këtë shkelje ishte 500 mijë lekë, por ky nen u rrëzua nga Gjykata Kushtetuese.
Në draftin e ri është rivendosur edhe neni, i cili i ndëshkon bizneset me gjobë nëse nuk afishojnë çmimet në një vend të dukshëm, edhe kjo një masë e rrëzuar nga Gjykata Kushtetuese. Por në projektligjin e ri, gjoba është ulur në 50 mijë lekë për bizneset e vogla dhe 100 mijë lekë për paguesit e tatim fitimit, nga 500 mijë lekë që u vendos fillimisht.
Moslëshimi i faturës tatimore, dëftesës tatimore apo і faturës tatimore me TVSH, dënohet me gjobë të barabartë me 100 për qind të tatimit të padeklaruar, si rezultat i moslëshimit të faturës, përveç tatimit dhe kamatëvonesave që llogariten dhe paguhen në përputhje me dispozitat e këtij ligji apo të ligjeve specifike tatimore.
