Dekreti i Presidentit që kthen në parlament ligjin për menaxhimin e integruar të mbetjeve, mund të kalojë në seancën e fundit plenare për këtë vit, pasi të jetë shprehur më parë komisioni për veprimtaritë prodhuese. Vendimtar për fatin e këtij ligji duket se do të jenë votat e deputetëve të LSI-së.
Është një nga ligjet më të përfolura të viteve të fundit për shkak se ka ardhur në dy forma. Ishte kabineti “Berisha” ai i cili e solli fillimisht ligjin për menaxhimin e integruar të mbetjeve, për tu rrëzuar më pas ka kabineti “Rama”. Ky i fundit, përmes tre deputetëve, e ri-solli në tavolinë të ri-shkruar. Sot, mes presionit popullor dhe dekretit të presidentit Nishani, i cili e ktheu për rishqyrtim ligjin, duket se gjithçka varet nga situata politike e momentit, në të cilën votat e deputetëve të përvetshëm duket se po luajnë rol vendimtar.
Në prag të përfundimit të sesionit parlamentar, i cili mbyll punimet duke shënuar të enjten e 22 Dhjetorit si seancën e fundit parlamentare, deputetët po përballen me një axhendë mjaft të ngjeshur.
E depozituar që prej datës 14 Tetor dhe e shtyrë prej javësh tashmë, në kalendarin e punimeve të Kuvendit, një nga ligjet më të diskutuara, ai për menaxhimin e integruar të mbetjeve, parashikohet të hidhet në votim në seancë më datë 22 Dhjetor.
Komisioni, ai për Veprimtarinë prodhuese, i kryesuar nga një prej deputetëve inicues të ligjit Eduart Shalsi, pritet të marrë në shqyrtim dekretin e Presidentit Nishani, i cili ktheu për ri-shqyrtim ligjin, me pretendimin se bie ndesh me Kushtetutën tonë dhe konventat ndërkombëtare.
Bazuar në rregulloren e Kuvendit, në nenin 86 të saj, afatet ligjore nisin nga momenti i shqyrtimit të dekretit në komision, pas të cilit komisioni Shalsi ka 8 javë kohë për të paraqitur raportin e tij, në mënyrë që dekreti të votohet në seancë plenare.
Edhe pse Veprimtaria Prodhuese ende nuk e ka marrë në shqyrtim këtë dekret, duket se kjo do të jetë arena e sfidës së rradhës, gjithmonë nëse ekziston vullneti politik për të mos e lënë këtë ligj të zvarritet deri në çeljen e sesionit të ri parlamentar të vitit tjetër.
Në skenarin e mundshëm të votimit të dekretit të Presidentit në Parlament vjen edhe sfida e rradhës e mazhorancës qeverisëse, duke marrë parasysh se rrëzimi apo miratimi i dekretit kërkon një shumice absolute, pra 71 vota në total. Pas debatit të ndezur mes kreut të opozitës shqiptare, Lulzim Basha dhe grupit parlamentar të LSI, lidhur me votimin e amendamentit Vasili për koncesionin e laboratorëve, vëmendja është zhvendosur në shpërndarjen e votave në parlament mes tre partive kryesore, PD- PS- LSI.
I tillë pritet edhe momenti i votimit të dekretit të Presidentit për ligjin e mbetjeve, në rast se deputetët dhe forcat politike Shqiptare i qëndrojnë deklaratave të tyre publike. Sipas një analize të votave, Partia Socialiste ka mbetur me 60 deputetë të regjistruar në grupin e saj parlamentar, vota të pamjaftueshme për të arritur shumicën absolute në parlament. Por edhe me votën e deputetëve Tom Doshi, Armando Prenga, Mirela Ferracaku dhe Mhill Fufi, socialistët marrin një maksimum prej 64 votash, të pamjaftueshme për të rrëzuar dekretin ‘Nishani’.
Vetë Partia Demokratike, e përfshirë në këtë çështje edhe përmes protestave apo mbështetjes së tyre, ka 45 vota në parlamentin shqiptar. Por me një përllogaritje të thjeshtë, nëse këtij numri do i bashkohen edhe votat e deputetëve Fatmir Mediu dhe Agron Duka, Ben Blushi dhe Mimoza Hafizi, Vangjel Dule dhe Nard Ndoka, të shpallur publikisht kundër ligjit për importin e mbetjeve, situata mund të ndryshojë.
Me 5 vota të PDIU-së të deklaruara kundër ligjit në fjalë, deputetët e pozicionuar përmes retorikës përbëjnë një total të pamjaftueshëm prej 56 votash, pa llogaritur Lëvizjen Socialiste për Integrim.
Sakaq kjo e fundit ka 20 vota parlamentare. Edhe pse e pozicionuar në ri-vlerësimin e ligjit në fjalë, duket se LSI ka mundësinë për të përmbysur situatën, cilado qoftë ajo.
Me 20 votat e saj LSI mund ti sigurojë fitoren të dy kampeve, si socialistëve me të cilët bashk-qeveris Shqipërinë, ashtu edhe opozitës, e cila në rastin e amendamentit “Vasili” të së enjtes së shkuar, refuzoi të bëhej pjesë e asaj që kryetari Basha e quan “lojë e vjetër e LSI-së”. /ABCNEWS
