“Asnjë diktat nuk mund t’i imponohet Ukrainës”. Kështu u shpreh kancelari i Gjermanisë, Olaf Scholz pas takimit me liderët e BE-së dhe shefin e NATO-s në Pallatin Elysee në Paris, duke nënvizuar se Europa duhet të vijojë mbështetjen e saj për Kievin pavarësisht qëndrimit të SHBA-ve.
“Ne mirëpresim faktin që ka bisedime për një marrëveshje paqeje, por për ne është e qartë se kjo nuk mund të jetë një diktat”, tha ai duke shigjetuar lëvizjet e fundit nga Donald Trump në këtë drejtim.
Scholz tha gjithashtu se Ukraina duhet të lejohet të mbrohet, të vazhdojë në rrugën e anëtarësimit në Bashkimin Evropian dhe të ketë ushtrinë e saj të fortë, duke theksuar se këto çështje nuk janë të negociueshme.
Por Scholz gjithashtu deklaroi se nuk mund të ketë përçarje midis Evropës dhe SHBA-së për sigurinë, pasi ai thekson rëndësinë e aleancës së NATO-s.
Sa i përket reformimit të rregullave fiskale të BE-së për të rritur financimet për mbrojtjen, ai sugjeroi që çdo shpenzim mbi 2% i PBB-së për mbrojtjen duhet të përjashtohet nga kufizimet ekzistuese. Kancelari gjerman thotë se nevojiten burime të reja financimi në mënyrë që mbështetja e mëtejshme për Ukrainën të mos vijë përmes shkurtimeve të buxheteve të brendshme dhe fondeve për shërbime publike.
Scholz u pyet edhe një herë për idenë e vendosjes së trupave evropiane në Ukrainë si pjesë e një force paqeruajtëse dhe ai tha se diskutime të tilla janë të parakohshme.
“Jam i irrituar nga sugjerime të tilla pasi ato janë spekulative dhe shumë të papërshtatshme”, u shpreh Scholz.
Ndërkohë, kryeministri suedez Ulf Kristersson tha në një postim në mediat sociale se vendi i tij dhe rajoni Nordiko-Baltik përfaqësohet në takim nga kryeministrja e Danimarkës, Mette Frederiksen, pasi ai këmbënguli se ata kanë qëndrim “unanim dhe të fortë në mbështetjen për Ukrainën”.
“Nuk duhet të zhvillohen diskutime për Ukrainën pa Ukrainën. Mbështetja për Ukrainën duhet të rritet dhe përshpejtohet”, tha Kristersson.
