U filmua duke keqtrajtuar nxënësit, nis procedimi penal ndaj një mësuesit. Prokurori e rrethit Elbasan ka referuar materialet hetimore në prokurorinë e rrethit gjyqësor Elbasan ndaj shtetasit Lutfi Baboçi 59 vjeç, banues në Librazhd, me profesion mësues në shkollën e mesme në fshatin Orenjë Librazhd.
Mësuesi akuzohet se më datë 06.02.2016 ka keqtrajtuar nxënësit e kësaj shkolle, me incialet A.A, 17 vjeç dhe D.SH, 18 vjeç, të dy banues në fshatin Orenjë Librazhd.
Burime hetimore pohuan se denoncimi u krye nga Drejtoresha e Drejtorisë Arsimore Librazhd Fatbardha Qatja.
Materialet i kanë kaluar Prokurorisë së Rrethit Gjyqësor Elbasan për veprën penale “Shpërdorimi i detyrës” dhe “Keqtrajtimi i të miturit”.
Gjatë kohëve të fundit ka pasur mjaft raste të denoncimit të arsimtarëve për ushtrim dhune në shkolla. Ndihmë të madhe po japin rrjetet sociale dhe teknologjia dixhitale (celularët smartfonë).
Por kjo ka hapur edhe një debat të madh lidhur me faktin nëse nxënësit duhet të mbajnë me vete apo jo pajisje të tilla që mundësojnë regjistrime.
