Policia ka arrestuar në flagrancë një 43-vjeçar, pasi ishte duke kultivuar 250 bimë kanabisi në afërsi të fshatit Gjash.
Gjatë kontrollit në një ambient në pronësi të këtij shtetasi, uniformat blu kanë gjetur një sasi farash cannabisi që dyshohet se posedoheshin me qëllim kultivimin.
“Si rezultat i kontrolleve dhe hetimeve proaktive që po kryhen në bazë të informacioneve nga inteligjenca policore, të siguruara në zbatim të masave të përcaktuara në planin operacional kombëtar “Territor i pastër”, nga Komisariati i Policisë Lezhë u godit një tjetër rast i kultivimit të bimëve narkotike. Për këtë rast, në kuadër të operacionit policor të koduar “Gjashi”, u kap në flagrancë dhe u vu në pranga shtetasi 43 vjeç, banues në fshatin Mërqi.
43-vjeçari dyshohet se kishte kultivuar 250 bimë cannabisi, në pyll, në afërsi të fshatit Gjash. Më tej, gjatë kontrollit në një ambient në pronësi të këtij shtetasi, Policia gjeti një sasi farash cannabisi që dyshohet se posedoheshin me qëllim kultivimin”, njofton policia.
Materialet procedurale i kaluan Prokurorisë pranë Gjykatës së Shkallës së Parë e Juridiksionit të Përgjithshëm Lezhë, për veprime të mëtejshme./Opinion.al
