“Kam kaluar momente që nuk mendoja se do i kaloja. Kam takuar persona që nuk kam menduar se do i takoja. Jam shumë e zhgënjyer”! Këto janë fjalët në një letër që është gjendur në vendin e ngjarjes ku u gjet trupi i pajetë i Suelës, gruas 39 vjeçe, nënës së tre fëmijëve.
Letra është lexuar ditën e djeshme në sallën e gjyqit nga prokurori i çështjes, ndërsa letra është gjetur nga burri i saj bashkë me trupin e pajetë të Suelës. Sadetin Sula, bashkëshorti i viktimës dhe personi i arrestuar si autori i dyshuar i asaj vrasjeje, jo vetëm që ka vijuar të kundërshtojë akuzën e vrasjes por, madje ka kundërshtuar edhe prokurorin për autenticitetin e shkrimit në letër. Sula i ka thënë gjykatës së Shkodrës se shkrimi që ishte në letër nuk i përket Suelës.
Duke mohuar këtë fakt, ndonëse ekspertët e kanë mjaft të lehtë ta vërtetojnë nga ana kaligrafike, Sadetin Sula, 47-vjeçari i vënë nën akuzën e rëndë të vrasjes së bashkëshortes, hedh idenë e një vrasjeje të Suelës. Gjithçka që ka ndodhur mes tyre mësohet se ai e ka treguar përgjatë marrjes në pyetje, ndërsa dje, në gjykatë, ka pohuar publikisht se Suelën nuk e kishte vetëm grua, por edhe shoqe. Janë një sërë dëshmish të dokumentuara nga ana e prokurorisë dhe e policisë që flasin për marrëdhënien mes tyre, ndërsa ende nuk bëhet me dije saktësisht se çfarë ka ndodhur me jetën e Suelës; u vra, u vetëvra, apo u vra nga bashkëshorti i saj, i cili tashmë gjendet brenda ambienteve të qelisë.
“U ngritëm në mëngjes dhe Suela më tha se nuk jam mirë. Kam shtrëngim në gjoks dhe jam e mërzitur për motrën për shkak të disa problemeve që kishte ajo. I thashë të mos mërzitej për të tjerët, por të shikonte familjen e vet. Kemi tre fëmijë dhe unë atë e kam patur grua, por edhe shoqe. Mes nesh ka qenë një marrëdhënie e shkëlqyer. Kemi shëtitur gjithë Evropën bashkë me fëmijët. Kërkoj që shteti të zbardhë ngjarjen si është në të vërtet. Jam gati të bashkëpunoj me drejtësinë për të ndihmuar edhe financiarisht që të zbardhet e vërteta”, ka rrëfyer i përlotur Sadetin Sula në sallën e gjyqit, ndërsa pritej të vlerësohej masa e arrestit për të. Kështu “arrest me burg” ka qenë masa e sigurisë që u dha nga Gjykata e Shkallës së Parë në Shkodër për 47-vjeçarin Sadetin Sula, i dyshuar për vrasjen e bashkëshortes së tij Suela Sula, e cila u gjend e vdekur në tualetin e biznesit familjar, mobilieri në fshatin Melgushë, në mesditën e 19 prillit. Sadetin Sula është paraqitur para togave të zeza në gjykatën e Shkodrës mjaft i pikëlluar dhe ka mohuar kategorikisht të ketë mbytur të shoqen, siç pretendon akuza. Madje ai ka kërkuar të zbardhet e vërteta, duke afruar bashkëpunimin e tij, si dhe kontribut financiar për të zbuluar atë që ka ndodhur me të shoqen.
Prokuroria
Akuza e përfaqësuar nga prokurori Arben Smaçi ka lexuar rrëfimin e të dyshuarit Sadetin Sula, se ditën e ngjarjes nuk ka dalë në punë, por ka pirë kafe në një lokal, pastaj ka paguar faturën e energjisë elektrike. Kur ka shkuar në dyqanin e tij, në fshatin Melgushë, nuk ka gjetur asnjeri aty dhe kur ka hapur derën e tualetit ka gjetur të shtrirë në tokë bashkëshorten e tij, Suela Sula, të maviosur në fyt, ndërsa pranë kishte dhe një litar. Sadetin Sula i ka vënë duart për të matur pulsin, ndërsa në tualet ka gjetur dhe një letër ku shkruhej “kam kaluar momente që nuk mendoja se do i kaloja. Kam takuar perso- Hetimet na që nuk kam menduar se do i takoja. Jam shumë e zhgënjyer”. Sadetin Sula në seancën e djeshme gjyqësore ka deklaruar se letrën nuk e ka vënë e shoqja, pasi nuk ishte shkrimi i saj. Akuza ka paraqitur si prova faktin që sipas autopsisë dhe ekspertizës mjeko ligjore, gjurmët e gishtave në trupin e viktimës, tek pjesa e fytit janë të Sadetin Sulës, ndërsa ai ka qenë kontradiktor në deklarimet e orareve të lëvizjeve të tij ditën e ngjarjes.
Ditën e ngjarjes, punonjësit e mobilierisë kanë qenë pushim dhe për këtë janë lajmëruar nga vetë Sadetin Sula. Akuza ka paraqitur si provë dhe dëshminë e një prej të afërmeve të viktimës që ka pohuar se çifti kohët e fundit kishte mosmarrëveshje. Avokati mbrojtës Ilir Golemi ka kërkuar lirimin e klientit të tij dhe vlerësimin e paligjshëm të ndalimit, pasi, sipas avokatit, akuza nuk mbështetet në prova dhe klienti i tij është marrë në pyetje pa prani të avokatit apo psikologut, si dhe duke qenë në një gjendje shoku psikologjik pas gjetjes së vdekur të bashkëshortes së tij. Trupi i gjykues i kryesuar nga gjyqtarja Irida Kacerja e ka vlerësuar të ligjshëm ndalimin e Sadetin Sulës dhe ka caktuar si masë sigurie arrest në burg. Çështja i ka kaluar për hetime të mëtejshme prokurorisë së Krimeve të Rënda në Tiranë. Të pranishëm në seancë gjyqësore kanë qenë vetëm të afërm të Sadetin Sulës.
Prokuroria kërkon kamerat e mobilierisë
Letra që është gjendur në tualetin e biznesit të Sadetin Sulës në Melgushë të Shkodrës, që pretendohet se është lënë nga bashkëshortja e tij para se ajo të ndërronte jetë, është edhe një prej fakteve që prokuroria e Shkodrës mund të shkojë te përcaktimi i saktë i shkakut të vdekjes së gruas. Edhe pse vijohet të konsiderohet një vrasje nga ana e bashkëshortit të saj, pasi është i vetmi person i mbajtur në pranga për atë ngjarje, prokuroria në kërkesën e saj ka bërë me dije vetëm se shenjat e gishtërinjve në fytin e viktimës rezultojnë të jenë të të arrestuarit.
Sadetin Sula, biznesmeni i njohur shkodran i mobilierisë, sipas të dhënave një prej të parëve biznesmenë në Shkodër, i ka thënë prokurorit, po edhe gjykatës, se në momentin që e ka gjetur në tualet, i ka matur pulsin, për të parë nëse ishte gjallë dhe se nuk është ai autori i asaj ngjarjeje. Megjithatë të dhënat tregojnë se në biznesin ku është gjendur e pajetë gruaja ka kamera dhe verifikohet lehtësisht nëse ka lëvizur person tjetër nëpër zonë. Po ashtu, janë telefonat, të afërmit dhe fëmijët ata që do të japin informacionet e duhura për vdekjen e parakohshme të Suelës, nënës së tre fëmijëve, që ende nuk dihet se çfarë do të bëhet me fatin e tyre.
