Kryeministri Rama ka bërë një letër të hapur ditën e sotme për lojtarët e Kombëtares shqiptare pas humbjes me Francën ditën e djeshme 2-0 në minutat e fundit.
Në letrën e tij, Rama citon edhe ish-trajnerin e Marsejës, Marcelo Bielsa, i cili mbajti dikur një fjalim epik në dhomat e zhveshjes për lojtarët e kësaj skuadre pas një humbje shokuese.
“Europiani ynë nuk ka mbaruar ende. Pas një nate të trazuar nga befasia e rëndë e çastit të fundit, ju sot duhet të besoni më shumë se kurrë tek vetvetja dhe, siç thotë i madhi Marcelo Bielsa, në fjalimin e tij epik përpara skuadrës pas një humbjeje të pamerituar, “ta pranoni helmin e padrejtësisë me besimin se, po të vazhdoni të luani kështu, do ta merrni me siguri atë që meritoni”, shkruan Rama duke iu referuar trajnerit argjentinas.
FJALIMI I BIELSAS PAS HUMBJES ME PSG
“Djema, është shumë e vështirë që të pranohet padrejtësia por më dëgjoni me kujdes se çfarë dua të them. Nëse ju luani siç luajtët sot deri në fund të sezonit, atëherë ju do të merrni shpërblimin që meritoni.
Unë e di se në këtë moment nuk ka asgjë që ju qetëson, dhe e di që ju jeni absolutisht të dërrmuar pasi nuk morët atë që meritonit. Por pranoni padrejtësinë dhe çdo gjë do të shkojë mirë në fund.
Ne kemi edhe nëntë ndeshje të tjera dhe nëse i luajmë si sot nuk ka asnjë mundësi që të mos e marrim atë që meritojmë.
Përtypeni helmin sot, duhet të bëheni të fortë! Luajini këto 9 ndeshje të mbetura si sot dhe shpërblimi do të vijë. Ju përgëzoj të gjithëve për gjithçka”.
