Teksa fliste nga qyteti i Durrësit, Presidenti Ilir Meta u shpreh se sot ka formalizuar një letër drejtuar OSBE-së për të negociuar me të dyja palët këtu për arritjen e një zgjidhjeje sa më të shpejtë, pasi nuk ka kohë.
“Sot unë kam formalizuar dhe një letër drejtuar Sekretarit të Përgjithshëm të OSBE , por edhe kryetarit të radhës së OSBE-së, ministrit të Jashtëm të Sllovakisë dhe presidentit të Asamblesë Parlamentare të OSBE-së meqënëse Shqipëria përgatitet për të marrë kryesimin e OSBE vitin e ardhshëm, dhe ky është një moment i rëndësishëm dhe historik për të negociuar me të dyja palët këtu për arritjen e një zgjidhjeje sa më të shpejt, pasi nuk kemi kohë. Jo vetëm për të parandaluar përshkallëzimin e mëtejshëm të kësaj situate të padenjë për qytetarët, por edhe për një vend i cili duhet të jetë shembull në kryesimin e OSBE”, tha Meta.
Pas kësaj deklarate nga Presidenti ka reaguar përmes një postimi në twitter Ministrja e Shtetit për Marrëdhëniet me Parlamentin, Elisa Spiropali, e cila i është përgjigjur me ironi se ai s’është më President, ndërsa letra mbetet si të tjerat, Export-Import Kafeje Qamili shpk.
“Baba Xhikja i paska kërkuar OSBE të bëhet arbitër mes paleve! Në fakt me atë letër ai paska pranuar thjesht që nuk është më as mbi palët, as mes paleve po thjesht udhëheqësi i njërës palë. Dmth s’është më President! Kurse letra mbetet si të tjerat: Export-Import Kafeje Qamili shpk” shkruan Spiropali në “Twitter”./Opinion.al
