Ministri i Brendshëm, Saimir Tahiri, me anë të një postimi në rrjetet sociale ka reaguar në lidhje me letrën e marrë nga Komisioneri Europian për Çështjet e Emigracionit dhe Sigurisë, Dimitris Avramopulos, i cili vlerësonte përpjekjet e Shqipërisë në luftën kundër kultivimit të kanabisit.
Në reagimin e tij Tahiri shprehet se kjo është një përgjigje inkurajuese për çfarë është bërë deri më tani dhe çfarë do të bëhet bashkë me partnerët. Ministri shpreh vendosmërinë për të bërë maksimumin në luftën kundër kanabisit.
“Përgjigje inkurajuese nga BE dhe Komisioneri Avramopulos për çfarë kemi bërë deri sot kundër drogës, e për ça do bëjmë nesër e tutje, bashkë me partnerët. Jemi të vendosur të bëjmë maksimumin, pavarësisht llumit e pengesave nga ata që deri dje ishin në qeveri e na lanë këto kusure, ndërsa sot çirren me gishta në vesh e sy mbyllur”, shkruan Tahiri.
Më herët edhe Kryeministri Edi Rama, në kundërpërgjigje të Presidentit Bujar Nishani, i cili deklaroi se do të mblidhte Këshillin e Sigurisë Kombëtare për gjendjen e kanabisit në vend, reagoi duke postuar gjithashtu letrën e Komisionerit Avramopulos.
