Autoritetet gjermane i kanë dhënë një javë afat për t’u larguar nga Gjermania një vajze e cila është vetëm 20 muajshe. Kjo me argumentin se, ajo nuk ka jetuar kurrë në Shqipëri dhe se nuk ka prova që është e rrezikuar atje. Lajmi bëhet i ditur nga mediat lokale, të cilat raportojnë se bëhet fjalë për një vajzë shqiptare të quajtur Edona.
20 muaj më parë ajo lindi në rajonin Sauerland, në perëndim të vendit, 11 ditë pasi prindërit e saj Eduart dhe Franga arritën nga Shqipëria për të kërkuar azil.
Por, fakti se ajo ka lindur në Gjermani, ndryshe nga vëllai i saj 6 vjeç, Edjoni, ka bërë që autoritetet të marrin një vendim të çuditshëm për kërkesën e saj për azil.
Të enjten e kaluar, Edona mori një letër 11 faqe të gjatë nga Zyra e Emigracionit dhe Refugjatëve ku i shpjegohej se ajo kishte një javë afat për t’u larguar nga Gjermania… e vetme pasi anëtarët e tjerë të familjes ende nuk kanë marrë përgjigje për statusin e azilit.
Në letër thuhet se, nëse Edona nuk bindet, atëherë ajo do të dëbohet me forcë. Letra i drejtohet drejtpërdrejtë vajzës e cila ende nuk ka mbushur 2 vjeçe.
“Persekutimi konkret dhe individual nuk mund të gjendet tek aplikuesja”, theksohet në letër, para se të shpjegohet se, “persekutimi nuk mund të ekzistojë nisur nga fakti se aplikuesja ka lindur në Gjermania dhe se nuk ka qenë kurrë në Shqipëri”.
Që prej verës së vitit 2015, Gjermania e konsideron Shqipërinë një “vend të origjinës së sigurt” që do të thotë se, azilkërkuesit duhet të provojnë në mënyrë specifike kërcënimet për të marrë statusin e azilantit.
Prindërit e Edonës, aplikuan në vitin 2014, ku ata provuan se kërcënoheshin nga fqinjët e tyre për shkak të gjakmarrjes. Aplikimi i tyre është ende duke u shqyrtuar./ Panorama.al
