Është luajtur finalja e vajtjes play-off në Serinë B dhe Peskara e Ledian Memushajt ka hedhur një hap gjigant përpara, sepse ka fituar 2-0 ndaj Trapanit. Në një “Adriatico” të tejmbushur, Pescara dominoi dhe e vuri nën presion kundërshtarin, që humbi qetësinë dhe që në minutën e 27- të mbeti me 10 lojtarë, pasi Skocarela mori kartonin e dytë të verdhë në pak minuta. Më pas, me qetësi Peskara priti momentin e duhur dhe në minutën e dytë të pjesës së dytë libiani Benali gjeti golin e avantazhit.
Më pas, sërish Peskara zotëroi lojën dhe në minutën e 71-të erdhi goli i dytë, me të zakonshmin Lapadula, 30 gola këtë sezon. Memushaj luajti 64 minuta, duke marrë edhe një karton të verdhë dy minuta para zëvendësimit, por detyrën e bëri shumë mirë, duke dhënë pasime të bukura, duke drejtuar mesfushën e duke tentuar edhe disa herë gjuajtjet nga distanca. Fitorja e sotme e lejon Peskarën të shkojë në Trapani për të mos humbur ose për të humbur me një gol diferencë, ndërkohë që Memushaj nuk do të jetë, pasi tashmë bashkohet me kombëtaren, për të luajtur në Europian.
