Nga Frozinone në Romë distanca është e shkurtër, rreth 75 kilometra, distancë që Arlind Ajeti e ka bërë shpesh këtë vit për qejf, ndërsa tashmë mund ta bëjë përfundimisht, për punë.
Mbrojtësi i kombëtares shqiptare ka mbyllur me sukses në aspektin personal sezonin, sepse shkëlqeu në pak muaj që luajti te Frozinone, duke u bërë ndër lojtarët më të spikatur të kësaj skuadre. Marrëveshja me Frozinonen ishte për rinovim automatik në rast mbijetese, por tani Frozinone ra dhe Ajeti është i lirë në treg, duke hapur “oreksin” e shumë klubeve.
Një ndër klubet më aktivë për të firmosur me Ajetin duket se është Lacio, me drejtorin sportiv Igli Tare që e njeh mirë mbrojtësin dhe e ka ndjekur edhe kur luante te Bazeli. Lalaziosiamonoi.it raporton se kalimi i Ajetit te Lacio mund të bëhet realitet shumë shpejt, por pengesa kryesore në këtë moment është mungesa e trajnerit te Lacio.
Synimi i klubit kryeqytetas është që të nisë merkaton vetëm pasi të ketë zyrtarizuar trajnerin e ri, ndaj me shumë mundësi Ajeti do të jetë pa skuadër deri në mbyllje të Europianit.
