Kryebashkiaku i Bulqizës, Lefter Alla paralajmëroi një ditë më parë se do të padiste ish-deputetin e PD, Ervin Salianji ndërkohë që ky i fundit ka deklaruar sot se ka patur dijeni për videon ku dyshohet se shfaqet Alla, vetëm ditën kur ajo u publikua.
Në një intervistë televizive, Salianji tha se PD nuk ka lidhje me këtë video dhe se është vënë në dijeni të përmbajtjes së saj ditën kur u publikua.
“Institucionet duhet të ishin mankthi i banditëve dhe kriminelëve, ndërkohë që ata vazhdojnë të qëndrojnë në institucione publike. Nuk ka lidhje PD, nuk kam pasur dijeni deri ditën që video është shfaqur, dhe padiskutim reagimi jonë ishte i menjëhershëm. Edhe reagimi i qeverisë duhet të jetë i menjëhershëm për ta shkarkuar. Nuk është ky rasti i parë. Këta vazhdojnë të qëndrojnë në detyrë pavarësisht se janë kapur me “presh në duar” si shkelës”, tha Salianji.
Lefter Alla akuzohet se është personi që shfaqet duke thithur kokainë në një video të publikuar nga gazetari Artan Hoxha. Megjithatë ai e ka mohuar këtë gjë duke thënë se video është e montuar dhe se e gjithë kjo bëhet për çështje politike nga PD. Ai paralajmëroi ditën e djeshme se do të ngrejë padi ndaj Ervin Salianjit duke e akuzuar atë si organizatorin e kësaj akuze. /Opinion.al
