Akuzat e Shteteve të Bashkuara kundër Moskës për ndërhyrje në zgjedhjet për Shtëpinë e Bardhë janë qesharake, ka deklaruar ministri i Jashtëm rus, Sergey Lavrov gjatë një interviste për rrjetin informativ amerikan CNN.
Lavrov theksoi se, nuk ka parë edhe një fakt të vetëm ku të bazohen akuzat e amerikaneve.
“Është qesharake të kesh këtë lloje vëmendjeje për një fuqi rajonale, siç na cilësoi presidenti Obama pak kohë më parë”, deklaroi Lavrov.
“Tani të gjithë në Shtetet e Bashkuara thonë se është Rusia ajo që menaxhon zgjedhjet amerikane, por nuk ka asnjë fakt të vetëm” , ka thënë Lavrov për gazetaren Christiane Amanpour.
Të premten e kaluar ishte hera e parë kur SHBA-te fajësuan zyrtarisht një shtet tjetër për ndërhyrje dhe influenca në zgjedhjet presidenciale amerikane që do të mbahen në 8 nëntor./TV Klan
