Gerard Pique është në qendër të vëmëndjes në prag të duelit mes Spanjës dhe Shqipërisë, kjo jo për çështje sportive por për çështje politike.
Mbrojtësi i Barcelonës, i cili është katalanas, u përlot teksa fliste për referendumin në Katalunjë dhe deklaroi para disa ditësh se nëse ja kërkon trajneri mund të japë dorëheqjen nga skuadra kombëtare. Gjithçka u pasua me reagime të ashpra aq sa në stërvitjen e rradhës tifozët e “mikpritën” në thonjza me thirrjet “fuera fuera”, në shqip, thjesht dhe pastër, përjashtë, pra largohu nga përfaqësuesja spanjolle, madje pati edhe ofendime në drejtim të 30 vjeçarit.
Kjo e detyroi trajnerin të shkurtonte minutazhin e seancës stërvitore. Situata e krijuar ka përfshirë të gjithë në kampin spanjoll. Trajneri Lopetegui dha mbështejten e plotë ndaj lojtarit duke deklaruar se Pique është në kombëtare për shkak se është një futbollist unikal dhe se bindjet e tij politike nuk i interesojnë aspak. Në të njëjtën linjë ishin në konferencën e rradhës për mediat edhe mesfushori Thiago Alcantara dhe futbollisti i Atleticos së Madridit, Koke.
Megithatë jo e gjithë skuadra është në krah të tij. Raportohet nga mediat iberike që kapiteni i ekipit Sergo Ramos pasi ka debatuar me Piquen pikërisht për shkak të deklaratave të këtij të fundit pro pavarësisë së Katalunjës dhe ka vendosur të ndërpresë mardhëniet me mbrojtësin e Barçës.
Gjithsesi Pique nuk kërkon të heqë dorë nga kombëtarja dhe do të veshë ngjyrën e kuqe të paktën deri në botërorin e Rusisë. Harmonia në kombëtaren e Spanjës është njësoj si harmonia mes Katalunjës dhe mbretit Felipe, pra nuk ekziston. Shpresojmë që një situatë e tillë të ndikojë edhe në fushën lojës, ose të ndikojë të paktën në ndeshjen kundër Shqipërisë.
