Prej ditësh në media qarkullojnë lajme se janë dorëhequr drejtorët e 6 Zyrave të Regjistrimit të Pasurive në rrethe (Hipoteka). Sot doli një informacion se është dorëhequr edhe drejtoresha e Hipotekës së Tiranës, znj. Lediana Bardhi.
Sipas ligjit dorëheqjet nga detyra i dorëzohen Ministrit të Drejtësisë, Gazment Bardhi i cili ka në varësi Hipotekat edhe pse ultimatumin për tu dorëhequr atyre ua dha kryeministri Edi Rama.
Opinion.al u interesua pranë Ministrisë së Drejtësisë për të mësuar se sa drejtorë kanë dhënë dorëheqjen deri më tani.
Burime zyrtare nga ky institucion thanë se në zyrën e ministrit teknik Gazment Bardhi nuk ka mbërritur deri tani asnjë dorëheqje. Ministria nuk hodhi poshtë lajmet, por sqaroi se zyrtarisht nuk ka ende asnjë drejtor të larguar apo dorëhequr nga Hipoteka. Pra drejtorët mund të kenë bërë gati për të lënë detyrën pas presionit publik që ushtroi Kryeministri, por shkresat e dorëheqjeve të tyre ende s’kanë mbërritur në Ministrinë e Drejtësisë. /Opinion.al
