Gazetarja Klodiana Lala ka folur në lidhje me vrasjen e gjyqtarit Astrit Kalaja brenda ambienteve të Gjykatës së Apelit nga Elvis Shkambi.
Në emisionin “Opinion”, Lala tha se në sallën e Gjykatës ka qenë të pranishëm dy palët që kanë patur konflikt pronësie për një godinë në Shkodër, nga njëra anë familja Shkambi, konkretisht Gjon Shkambi dhe nipi i tij autori Elvis Shkambi dhe në palën tjetër familja Kurtaj.
Gazetarja thotë se në momentin që Astrit Kalaja është ngritur në këmbë për të lexuar vendimin e gjykatës, Elvis Shkambi e ka qëlluar me armë. Sipas saj pasi është qëlluar herën e parë, gjyqtari ka tentuar të largohej nga vendi, por autori e ka qëlluar dhe dy herë të tjera me pistoletë duke i shkaktuar vdekjen.
“Gjon Shkambi sot ka ardhur më herët se në orarin e caktuar bashke me nipin e tij dhe kanë hyre të dy. Të dyja palët familja Shkambi dhe familja Kurtaj në një sall të vogël. Quhet sallë, por është dhomë. Pamjet janë të qarta, palët kundërshtare, sekretarja që është duke zbardhur vendimin, në momentin që gjyqtari ngrihet në këmbë për të shpallur vendimin, në atë moment autori e qëllon. Gjyqtari tenton të fshihet, por ai më pas e qëllon dhe dy herë të tjera. Autori nuk është larguar dhe kjo tregon se kjo ishte ngjarje e paramenduar”,-tha Lala.
