Mbrojtësi Arlind Ajeti e ka nisur sërish si titullar ndeshjen e sotme ndaj Inter dhe pikërisht kur Crotone po luante më mirë, shtatlarti shqiptar është dëmtuar dhe ka dalë nga loja në minutën e 66-të.
Natyrisht që kjo bën me “dhimbje koke” trajnerin e Kombëtares shqiptare, Christian Panucci, dy javë para grumbullimit të përfaqësueses.
Ajeti zhvilloi një ndeshje shumë të mirë sot, duke u treguar vendimtar me ndërhyrjet e tij në disa momente të ndeshjes, për të ndalur Joao Marion dhe Icardin, që i drejtoheshin portës së Crotones.
Në minutën e 64-t të ndeshjes ai kërkoi ndihmën e stafit mjekësor dhe më pas la fushën e lojës, duke u zëvendësuar nga trajneri Nicola.
Duke llogaritur që në ndeshjen e radhës të Kombëtares, kundër Spanjës, mungon për kartonë të verdhë edhe Mërgim Mavraj, dhe ende nuk dihet nëse Ansi Agolli do të rikuperohet, dëmtimi i Ajetit mund të detyrojë Panuccin të rindërtojë plotësisht qendrën e prapavijës në krahasim me dy ndeshjet e kaluara.
Tani duhen pritur vizitat më të specializuara gjatë ditëve në vijim për mbrojtësin e Kombëtares, me shpresën që ndalesa e tij të mos jetë aq e gjatë.
