Policia e Tiranës ka identifikuar autorët e vrasjes së Elton Çiços në zonën e Bllokut një muaj më parë në lokal “De Niro”.
Autorët e dyshuar janë Renato Milloshi dhe Jani Alia. Policia thotë se është zbuluar edhe arsyeja e vrasjes, por nuk dëshiron ta bëjë publike pasi dëmtohen hetimet.
Përmes një dalje për mediat, zyrtari i policisë tha se “dy autorët janë shpallur në kërkim, ndaj duhet edhe ndihma e qytetarëve për kapjen e tyre. Qytetarët mund të telefonojnë në polici nëse dinë vendndodhjen e autorëve”, tha zyrtari, duke cilësuar se shpërblimi është 5 mln lekë të vjetra.
Për dy personat e dyshuar si autorë të vrasjes, Milloshi dhe Alia gjykata ka vendosur masën e sigurisë arrest me burg në mungesë.
Njoftimi i plotë i policisë
Strukturat e Drejtorisë Vendore të Policisë Tiranë në bashkëpunim me Strukturat Qendrore të Drejtorisë së Policisë së Shtetit dhe me Prokurorinë e Rrethit Gjyqësor Tiranë, pas një pune intensive në aspektin gjurmues dhe procedurial kanë bërë të mundur zbulimin, dokumentimin dhe identifikimin e autorëve të ngjarjes së ndodhur në lokalin “De Niro” në datë 1 Maj 2016, ku mbeti i vrarë pas një atentati shtetasi Elton Çiço, person të njohur si me precedentë kriminalë.
Autorët e dyshuar të kësaj vepre penale janë shtetasit: Jani Naim Alia, 39 vjeç, lindur dhe banues në Tepelenë. Renato Hysni Milloshi, 36 vjeç, lindur në Berat dhe banues në Tiranë, të 2 me precedentë të mëparshëm kriminalë për vepra të rënda penale. Për të dy këta dy shtetas, Gjykata e Rrethit Gjyqësor Tiranë me vendimet nr. 1379 dhe 1380 dt. 24 maj 2016 ka vendosur masën e sigurisë “Arrest në burg”.
Gjatë hetimeve intensive për zbulimin e kësaj ngjarje të rëndë janë mbledhur një sërë provash të vlefshme të cilat kanë ndihmuar në zbulimin e dokumentimin ligjor të kësaj ngjarje të rëndë. Ndërkohë vazhdon puna për dokumentimin me prova ligjore të të gjithë mekanizmit kriminal të ngjarjes si dhe personave të tjerë që mund të rezultojnë të përfshirë. Për këtë ngjarje, aktualisht janë arrestuar edhe 2 persona të tjerë për veprime që pengojnë zbulimin e së vërtetës.
Në këtë kuadër, Policisë e Shtetit i kërkon ndihmë publikut në dhënien e informacioneve për vendndodhjen e dy shtetasve të shpallur në kërkim si persona me rrezikshmëri të lartë. Ndihma e qytetarëve është themelore për arrestimin dhe vënien para drejtësisë të autorëve të dyshuar për këtë vrasje.
Qytetaraët që kanë informacion, mund të telefonojë në numrin 069 41 10 299, duke siguruar anonimat të plotë. Çdo informacion i vlefshëm do të shpërblehet me 500 mijë lekë të reja.
