Një tjetër aksident është shënuar sot në minierën e Bulqizës. Dy minatorë mbeten të plagosur dhe janë transportuar me helikopter në Tiranë. Policia jep pak detaje për këtë ngjarje të rëndë, pa specifikuar zonën minerare apo rrethanat në të cilat u plagosën minatorët. Policia tha se janë aksidentuar në punë, shtetasit S.Z rreth 50 vjeç, banues në Bulqizëdhe M.Gj, rreth 31 vjeç, banues në Bulqizë.
Njoftimi i plotë:
Rreth orës 13.00, Salla operative e Komisariatit të Bulqizës, është njoftuar nga urgjenca e spitalit të Bulqizës, se kanë shkuar për të marrë ndihmë mjekësore 2 shtetas (punëtor miniere).
Menjëherë është ngritur grupi hetimor ku nga verifikimet paraprake kanë konstatuar se :
Në minierën e kromit në Bulqizë gjatë punës janë aksidentuar shtetasit S.Z, rreth 50 vjeç, banues në Bulqizë, i cili po transportohet me helikopter drejt Tiranës, dhe M.Gj, rreth 31 vjeç, banues në Bulqizë, i cili transportohet me ambulancë drejt spitalit të Peshkopisë. Grupi hetimor po kryen hetimet në vendngjarje dhe po punohet për zbardhjen dhe shkaqet e kësaj ngjarje.
Kronologjia
Më 11 Maj, në minierën e kromit në zonën D, Bulqizë, gjatë punës është aksidentuar dhe ka humbur jetën Medi Hidri 62 vjeç.
Më 16 Maj humbi jetën Shpresa Rami, 50 vjeçe e cila u aksidentua nga një fadromë teksa mblidhte krom në vendin e grumbullimit.
Në muajin Prill të po këtij viti vdiqën dy minatorë të tjerë.
Më 12 Prill në qytezën e Klosit, në galerinë nr.4 në zonën e njohur nga minatorët si “Lugu i Madh” gjatë punës në galeri është aksidentuar dhe ka gjetur vdekjen nga shpërthimi i lëndëve eksplozive, punonjësi P.M, 57 vjeç.
Më 14 Prill, në Bulqizë në një nga galeritë private në afërsi të pusit nr.41. Angjelosh Shahini, minator 37 vjeç me detyrë zjarrmëtar humbi jetën. Sipas policisë atij i shpërtheu lënda plasëse në dorë.
/Opinion.al
