Mbi dy orë ka zgjatur takimi mes përfaqësuesit special të Bashkimit Europian për dialogun Prishtinë-Beograd, Miroslav Lajcak, me kryeministrin e Kosovës, Albin Kurti. Ata folën kryesisht për zgjidhjen e krizës në veri të Kosovës, me një fokus të veçantë në zbatimin e rekomandimit të ndërkombëtarëve.
Lajçak foli edhe për sanksione ndaj Kosovës duke thënë se dëshira e tij është që të mos ketë ndëshkim, por tha se vendimin e marrin shtetet anëtare të Bashkimit Europian. Gjithashtu adresoi dhe pyetjen pse Serbia nuk po ndëshkohet.
“BE-ja e ka bërë të qartë se ka sanksione të gatshme edhe për Serbinë. Do të zbatohen nëse kuptohet se Serbia nuk po vepron në përputhje me kërkesat e BE-së. Është vendim i shteteve anëtare”, shtoi i dërguari i BE.
Më herët Lajçak u takua edhe me presidenten Vjosa Osmani, për të diskutuar pikërisht për zgjidhjen e krizës në veri.
“Presidentja Osmani ka theksuar se institucionet e Kosovës janë të përkushtuara që së bashku me partnerët ndërkombëtarë t`i tejkalojnë sfidat aktuale dhe se Kosova ka demonstruar vullnet për deeskalim, duke ofruar organizimin e zgjedhjeve të reja në veri të vendit, në përputhje me kornizën ligjore të Kosovës”, thuhet në një njoftim të presidencës së Kosovës.
Ndërkohë, Lajçak do të vizitojë edhe Beogradin, si pjesë e vizitave të tij në kuadër të zbutjes së tensioneve mes dyja vendeve dhe rikthimin e liderëve në tryezën e dialogut. Ndërmjetësuesit pritet që gjatë të mërkurës të takohet me presidentin serb, Aleksandër Vuçiç.
