Shtetasi Altin Lleshi ka pretenduar se tri ditë më parë ka qenë në fshatin Shkafane duke pirë kafe. Ai ka pohuar më tej se aty ka shkuar një shtetas që ai nuk e njihte dhe i ka ofruar punë.
Janë nisur bashkë me personin që i arrestuari thotë se nuk e njihte dhe kanë shkuar në fshatin Rrotull, ku kanë hyrë brenda shtëpisë që ishte përshtatur si punishte droge.
I arrestuari ka thënë se është trembur kur ka parë hashashin brenda ndërtesës, pasi nuk i kishte ndodhur asnjëherë. Më tej, ai ka pretenduar se personat që gjeti aty e kanë mësuar se si duhej të punonte me pastrimin e përpunimin e bimës së hashashit.
Duke qenë se nuk njihte asnjërin nga personat aty, i arrestuari ka thënë se ka pyetur njërin dhe ka marrë përgjigjen “çfarë të duhet ty, shiko punën tënde!”.
Ky person sipas të arrestuarit ka thënë diçka në lidhje me shtetin. Më pas ai ka marrë edhe persona të tjerë në Hamallaj, që i ka çuar te punishtja e lëndës narkotike në Ishëm, por nuk u ka treguar çfarë pune do të bënin, pasi personat që “e kishin punësuar” i kishin thënë të bënte kujdes që asgjë të mos merrej vesh në lidhje me punën që bënin.
