Punonjësit në Venezuelë do ta kenë pushim të premten, gjatë këtij muaji dhe muajit maj, në mënyrë që shteti të kursejë energji pas një krize energjetike që ka kapluar vendin.
Presidenti Nicolas Maduro, gjatë një paraqitje për televizionin shtetëror, tha se venezuelianët do të kenë “pushime më të gjata”, duke njoftuar kështu për planin 60-ditor për luftimin e krizës energjetike.
“Ky plan është për 60 ditë, për dy muaj, dhe do t’ia mundësojë vendit që të kalojë periudhën më të vështirë. U bëj thirrje familjeve, të rinjve, për t’iu bashkuar këtij plani me disiplinë dhe me bashkëpunim të plotë, për të përballuar këtë situatë ekstreme”, tha Maduro.
Ky plan i qeverisë venezueliane do të zgjasë deri më 6 qershor, raporton Agence France Press.
