Diego Pablo Simeone, i cili drejton Atletico Madrid që prej vitit 2011, dhe ka arritur suksese të mëdha në ditët e arta të Realit dhe Barcelonës, ka dhënë një mendim për trajnerët më të mirë me të cilët ai është përballur në karrierën e tij.
Argjentinasi ka vendosur në vendin e parë italianin Carlo Ancelotti edhe pse ky i fundit nuk mundi ta çonte Realit te trofetë këtë sezon.
“Jo vetëm taktikisht, por edhe psikologjikisht, Ancelotti është trajneri më i mirë në botë”, ka thënë Simeone.
Më tej, ai ka folur edhe për Mourinho-n dhe Guardiolan, dy emra të tjerë të mëdhenj në rolin e trajnerit gjatë viteve të fundit.
“Mourinho e ka treguar veten, pasi ka drejtuar skuadra të ndryshme Porto, Inter, Tottenham, Manchester United e Romën. Në anën tjetër është Guardiola. Ai kërkonte një numër 9 dhe drejtuesit i sjellin më të mirin në botë. Megjithatë, gjëja më e vështirë është të jesh triumfues në vazhdimësi dhe Guardiola po e bën një gjë të tillë”, u shpreh Simeone.
